मंसिर ५
जिल्ला प्रहरी कार्यालय दोलखाले सुन तस्करी प्रकरणको अनुसन्धान पूरा गरी आज सो सम्बन्धी प्रतिवेदन जिल्ला सरकारी वकिल कार्यालय दोलखालाई बुझाएको छ । लामाबगरको फलाक नाका हुँदै अवैध रुपमा ल्याईएको ११ किलो ५ सय ३२ दशमव ३८ ग्राम सुन बरामद भएको करिब डेढ महिनापछि प्रहरीले अनुसन्धान प्रतिवेदन जिल्ला सरकारी वकिल कार्यालयलाई बुझाएको हो । प्रहरी र सिआईवीको टोलीले सुन तस्करी प्रकरणको अनुसन्धान पुरा गरी प्रतिवेदनसहित पक्राउ परेकाहरुलाई १५ जना मध्ये एक जना बालक बाहेक १४ जना र प्रतिवेदन जिल्ला सरकारी वकिल कार्यालय दोलखामा बुझाएको जिल्ला प्रहरी कार्यालय दोलखाका प्रहरी नायव उपरीक्षक दिपक खड्काले वताउनु भयो ।
प्रहरी नायव उपरीक्षक खड्काका अनुसार उनीहरुलाई भन्सार ऐन २०६४,संगठित अपराध निवारण ऐन २०७०, नेपाल राष्ट्र वैंक ऐन २०५८, बालबालिका सम्वन्धी ऐन २०७५ र मुलुकी अपराधसंहिता २०७४ को दफा ४३ को एकिकृत कसुरमा मुद्धा चलाइने छ । सुन तस्करीमा संलग्न भई फरार रहेका अन्य १२ जनाको भने खोजी भईरहेको र उनीहरु पक्राउ परेपछि पुरक अभियोग लिएर जाने प्रहरीको भनाई छ । प्रहरी अनुुसन्धानको क्रममा सुन तस्करहरुको गिरोहले चीनको तिव्वतसँग सिमाना जोडिएको दोलखाको लामावगरको फलाक नाकावाट डोरीमा सुन बाँधेर खोला पार गरी तस्करी गरेको पाईएको प्रहरी नायव उपरिक्षक खड्काले जानकारी दिनुभयो ।
पक्राउ परेका साथमा सुनको विस्कुट ११ किलो,सुनका गरगहना ५ सय ३२.३८ ग्राम,नगद १८ लाख ३३ हजार ५ सय रहेको छ भने बरामद सुनको मूल्य १० करोड माथि रहेको प्रहरीले जनाएको छ ।