तारादेवी बस्नेत

मंसिर १८
समृद्धिको लागि सङ्कल्प यात्रामा निस्किएको नेकपा एमालेको टोली मङ्सिर २५ गते दोलखा आइपुग्ने भएको छ । ‘सम्बन्ध स्थानीय, सन्देश राष्ट्रिय’ भन्ने नारा सहित सुरु भएको नेकपा एमालेको १९ दिने कार्यक्रमको क्रममा दोलखा प्रवेशद्वारमा मंसिर २५ गते भव्य स्वागत गरिने तयारी भई रहेको नेकपा एमाले दोलखाले जनाएको छ ।
सिन्धुपाल्चोक र दोलखाको सीमाना रहेको भीमेश्वर नगरपालिकाको प्रवेशद्वारामा नै अध्यक्ष केपी शर्मा ओली सहितको टोलीलाई भव्य वागत गर्ने कार्यक्रम रहेको नेकपा एमाले दोलखाले जनाएको छ । उक्त टोलीलाई खरिढुङगा,बोच,मकैबारी हुदैँ भीमेश्वर नगरपालिका वडा नम्वर ६ का विभिन्न स्थानहरुमा स्वागत गरिने छ । २५ गते दिउँसो सदरमुकाम चरिकोटमा बहृत सभाको आयोजना गरिने कार्यक्रम समेत तय गरिएको छ ।
सभामा अध्यक्ष ओलीले सम्वोधन गर्नुहुने नेकपा एमाले जिल्ला अधिवेशन आयोजक कमीटीका सहसंयोजक राजेन्द्र मानन्धरले जानकारी दिनुभयो । चरिकोटको बृहत सभा पश्चात पीपलबोटमा जेष्ठ नागरिकसँग भेटघाट कार्यक्रम रहेको छ भने किरातीछाँप,तामाकोशी,भिरकोट,मालुमा पनि स्वागत गरिने छ । त्यसपश्चात मेलुङको सितलीमा कृषकहरुसँग भेटघाटनकार्यक्रम राखिएको मेलुङ गाउँपालिका वडा नम्वर ७ का वडा अध्यक्ष नवराज खड्काले जानकारी दिनुभयो । जिल्लाको पार्टी कमिटिले किर्नेटारबाट सङ्कल्प यात्रामा निस्किएको नेकपा एमालेको टोलीलाई २५ गते नै बिदाई गर्ने छ । नेकपा एमालेले सुदूरपश्चिम बैतडीको झुलाघाटबाट मध्य पहाडी पुष्पलाल लोक मार्गलाई आधार बनाएर पाँचथरको चिवाभञ्ज्याङसम्म समृद्धिको लागि सङ्कल्प यात्रा सुरु गरेको हो । यात्राका क्रममा मध्य पहाडको अवस्था र विकासको सम्भावना पहिचान गर्ने एमालेले जनाएको छ ।