दोलखाको चरिकोटमा निःशुल्क स्वास्थ्य शिविर सञ्चालन भएको । गौरीशंकर बहुमुखी क्याम्पस चरिकोटमा हाडजोर्नी तथा नसा रोग सम्बन्धि ३ दिने शिविर सञ्चालन भएको हो । नेपाल रेडक्रस सोसाईटी जिल्ला शाखा दोलखाको आयोजना तथा सुःस्वास्थ्य हस्पिटल काठमाडौंको प्राविधिक सहयोगमा स्वास्थ्य शिविर सुरु भएको आयोजकले जनाएको छ ।
३ दिनसम्म सञ्चालन गरिने फिजियोथेरापी, अकुंपञ्चर र प्राकृतिक चिकित्सा पद्धतिबाट कम्मर दुख्ने, गर्दन दुख्ने, घुँडा दुख्ने, जोर्नी दुख्ने, नसा च्यापिएको, माइग्रेसन र पिनास, वाथ रोग र हड्डी खिइएको लगायतका रोगको उपचार गरिने सुस्वास्थ्य हस्पिटल काठमाडौंका डाक्टर सुदर्शन बस्नेतले बताउनुभयो ।
नेपाल रेडक्रस सोसाइटी जिल्ला शाखा दोलखाका सभापति ईश्वरीप्रसाद दाहालको अध्यक्षतामा भएको कार्यक्रममा भीमेश्वर नगरपालिकाका नगर प्रमुख ईश्वरनारायण मानन्धरले शिविरको उद्घाटन गर्नुभएको थियो ।
पुुष २०,२१ र २२ गते सम्म सञ्चालन हुने शिविरमा डाक्टर सुदर्शन बस्नेत, डा. आशा विके, डा. विशाल राई, भावना थापा, निरुता सिंह ठकुरी, संगीता कार्की, सौरभ खनाल र अनिता सिंहले उपचार गर्नुहुनेछ ।