कालिका माध्यमिक विद्यालय सुन्द्रावतीमा माध्यमिक विद्यालय स्तरीय हाजिरी जवाफ प्रतियोगिता सम्पन्न भएको छ ।
कालिका माध्यमिक विद्यालय सुन्द्रावतीको आयोजना, नेपाल रेडक्रस सोसाइटी दोलखा जिल्ला शाखा र सामुदायिक सिकाइ केन्द्र सुन्द्रावतीको सह आयोजनामा कालिका मावि सुन्द्रावतीमा माध्यमिक विद्यालय स्तरीय हाजिरी जवाफ प्रतियोगिता सम्पन्न भएको हो । प्रतियोगितामा कालिञ्चोक गाउँपालिकाका ११ वटा विद्यालयको सहभागिता रहेको थियो ।
कालिञ्चोक गाउँपालिकाका उपाध्यक्ष कुल बहादुर बुढाथोकीको प्रमुख आतिथ्यतामा सम्पन्न प्रतियोगितामा लापिलाङ मावि लापिलाङ प्रथम, जनज्योति मावि लेप्टुङ द्वितीय, हिलेपानी मावि हिलेपानी तृतीय र सित्का मावि सित्काले सान्त्वना प्राप्त गर्न सफल भएका छन् । कार्यक्रमका प्रमुख अतिथि उपाध्यक्ष बुढाथोकीले प्रतियोगितामा विजयी विद्यार्थीलाई पुरस्कार वितरण गद बौद्धिक प्रतियोगिताबाट विद्यार्थीहरूमा प्रतिस्प्रर्धाको भावना बढेर शैक्षिक गुणस्तर अभिबृद्धि गर्न सहयोग मिल्ने धारणा राख्नुभयो ।

कालिञ्चोक गाउँपालिका वडा नं. ९ का वडाध्यक्ष रामप्रसाद मैनालीले प्रतियोगिता आयोजना गर्ने विद्यालय र संस्थाहरू तथा सहभागी विद्यालयहरूलाई धन्यवाद ज्ञापन गर्दै विजयी र सहभागीहरूलाई बधाई ज्ञापन गर्नुभयो ।
प्रतियोगितामा कार्यक्रमको औचित्यमाथि कालिका माविका प्रधानअध्यापक सन्तोष अधिकारीले प्रकाश पार्नुभएको थियो भने शिक्षक कालिका शिवाकोटीले स्वागत मन्तव्य र शिक्षक पुण्य प्रसाद ओलीले कार्यक्रमको सहजीकरण गर्नुभएको थियो ।
नेपाल रेडक्रस सोसाइटी दोलखा जिल्ला शाखा, सामुदायिक सिकाइ केन्द्र सुन्द्रावतीका प्रमुख एवम प्रतिनिधि, विभिन्न विद्यालयका शिक्षक विद्यार्थी,अभिभावक लगायतको उपस्थिति रहेको थियो ।