दोलखाको मैनापोखरीमा सञ्चारकर्मीसंग जनसचेतन साक्षात्कार कार्यक्रम आयोजना गरिएको छ । शनिबार जनसचेतन बचत तथा ऋण सहकारी संस्था दोलखाले संस्थाको मुख्य कार्यालय मैनापोखरीमा दोलखाका सञ्चारकर्मीसंग साक्षात्कार गरेको हो ।
वर्तमान समयमा सहकारीमा देखिएका समस्या न्युनीकरण गरी सहकारी अभियानलाई थप प्रभावकारी बनाउन सञ्चारकर्मीको भूमिका महत्वपूर्ण भएकाले कार्यक्रम आयोजना गरिएको संस्थाका अध्यक्ष हेमन्त चौलागाईँको भनाई छ ।
सञ्चार क्षेत्रसंग निरन्तर सहकार्यको दीर्घकालीन योजना बनाएर जानुपर्ने,संस्थाको गरिमा जोगाउन सञ्चालकहरु मितव्ययी र इमान्दार भएर लाग्नुपर्ने,संस्थाले गरेका सबल र असल अभ्यासको तथ्याङ व्यवस्थित बनाउनु पर्ने, ऋण लगानीका क्षेत्रका विषयमा अनुसन्धान गरी लगानीका क्षेत्रमा रुपान्तरण गर्नुपर्ने लगायतका सुझाव जिल्लाका सञ्चारकर्मीहरुले कार्यक्रमको सन्दर्भमा दिएका थिए ।
सञ्चारकर्मीको जिज्ञासाको जवाफ दिँदै संस्थाका अध्यक्ष हेमन्त चौलागाईँले सहकारीमा अरु चुनौति भएपनि वित्तीय सूचकमा बलियो भएका कारण सहकारीलाई पूर्ण विश्वास गर्न आग्रह गर्नुभयो । “सहकारी सबै हिसाबले सकारात्मक,व्यवस्थित र मर्यादित छ । अब सहकारीलाई अझ बलियो बनाउन सबैको हातेमालो आवश्यक । सञ्चारकर्मीले अभियानलाई सकारात्मक रुपमा प्रचार गरिदिनुस ।” उहाँले भन्नुभयो ।
सहकारीले सञ्चार क्षेत्रसंग सम्बन्ध बलियो बनाउन योजना बनाएर सहकार्य गर्ने समेत अध्यक्ष चौलागाईँले प्रतिवद्धता व्यक्त गर्नुभयो ।

वर्तमान समयमा सहकारीमा देखिएका समस्याका कारण आपना शेयर सदस्यमा निराशा छाएको छ । शेयर सदस्यको निराशालाई आशामा परिणत गर्न सञ्चार क्षेत्रले सकारात्मक सन्देश दिनुपर्ने कुरामा संस्थाको जोड रहेको छ ।
कार्यक्रममा जिल्लाका पत्रकार,सहकारीका सञ्चालक,प्रमुख कार्यकारी अधिकृत र विभिन्न विषयगत शाखा प्रमुखहरुको सहभागिता रहेको थियो ।
सहकारीको समग्र अवस्थाका विषयमा जानकारी दिँदै संस्थाका प्रमुख कार्यकारी अधिकृत नवराज दहालले सहकारी संस्था र सञ्चारकर्मीबीच सम्बन्ध सुदृढ गरी संस्थाका सबल पक्षको प्रचार गर्ने उद्देश्यले सञ्चारकर्मीसंग जनसचेतन कार्यक्रम आयोजना गरिएको बताउनुभयो ।
संस्थाका प्रमुख कार्यकारी अधिकृत दहालका अनुसार मुख्य कार्यालय मैनापोखरी बजारमा रहेको छ । जहाँ साँढे ४ तलाको सुविधा सम्पन्न भवनबाट सेवाका कार्यक्रम सञ्चालन हुँदै आएको छ भने मुख्य कार्यालयसहित १७ वटा सेवा केन्द्रबाट सेवा दिँदै आएको छ । संस्थामा हाल ४० हजारको नजिक शेयर सदस्य रहेका छन् । पछिल्लो तथ्याङक अनुसार २ अर्व ४८ कारेड ९२ लाख ६६ हजार बराबर संस्थाको कारोबार रहेको छ । संस्थामा ३२ जना महिलासहित ६४ जना कर्मचारी रहेका छन् ।