दोलखा,
दोलखाको मेलुङ सम्पन्न निःशुल्क आँखा शिविरमा ४७ जनाको मोतियाविन्दुको शल्यक्रिया सम्पन्न भएको छ । गत २० गतेबाट सञ्चालन भएको आँखा शिविरमा गाउँपालिकाका १ हजार बढीले सेवा लिन सफल भएको गाउँपालिकाले जनाएको छ ।
तिलगंगा आँखा प्रतिष्ठान, लायन्स क्लब अफ दोलखा, दोलखा लायन्स आँखा केन्द्र र मेलुङ गाउँपालिकाको संयुक्त आयोजनामा सम्पन्न आँखा शिविरमा ४७ जनाको मोतियाबिन्दु र ३ जनाको आँखामा मासु पलाएको सहित ५० जनाको अप्रेसन र हजाराँैले सेवा लिन सफल भएको गाउँपालिका उपाध्यक्ष गायत्री आचार्यले बताउनुभयो ।

गाउँपालिकाकै त्रिभुवन माविमा तिलगंगा आँखा प्रतिष्ठानका वरिष्ठ नेत्ररोग विशेषज्ञ रिना बज्राचार्यको टोलीले आँखा अप्रेसन गरेको थियो ।
गत फागुन २० गतेदेखि पालिकाको सबै वडामा शिविर गरी शल्यक्रियाका लागि छनौट गरिएको थियो । गाउँपालिकामा रहेका ७ वटै वडाहरूमा भएको आँखा शिविरबाट मोतिया विन्दुको समस्या भएका व्यक्तिको अप्रेसन गरिएको थियो ।
गाउँपालिकाले शल्यक्रिया गर्नुपर्ने र गरिसकेका विरामीको लागि घरघरबाट सवारी साधनको सेवा र खानेवस्ने प्रवन्धसमेत गरेको थियो । आँखाको दृष्टि पाएसंगै धेरै जेष्ठनागरिकले खुसी व्यक्त गरेका छन् ।
आँखाको उपचार र शल्यक्रियापछि दृष्टि गुमाएकाहरुले दृष्टि फिर्ता पाएपछि गाउँपालिका बासीमा खुसी छाएको छ ।