भीमेश्वर नगरपालिका
दोलखा

केही वर्ष अघिसम्म घर धन्दामा सीमित भीमेश्वर नगरपालिका ५ की  बबिता नेपालीको अहिले दैनिकी फेरिएको छ ।  घर धन्दामा सीमित नेपालीलाई विगत एक वर्षदेखि जिल्लामा हुने गरेका हरेक गतिविधिमा पञ्चेबाजा बजाउन भ्याइनभ्याइ छ ।  नगरपालिकाले पञ्चेबाजा बजाउने तालिम दिईएसँगै वडा नम्वर ५ का ११ जना महिलाको दैनिकी वविताको जस्तै छ ।। घरको काममा नै सीमित नेपाली आजभोलि जिल्लामा हुने उत्सव र महोत्सवका विभिन्न कार्यक्रममा पञ्चेबाजा वजाएर हिड्न पाउँदा निकै खुुसी बताउनुहुन्छ । वविताजस्तै २२ देखि ५० वर्षसम्मका महिलाहरु आजभोलि एउटै पोसाकमा पञ्चेवाजा बजाएर हिड्ने गरेका छन् ।

नगरपालिकाले प्रदान गरेका धेरै सिप विकास तालिम मध्ये पञ्चेबाजा तालिम निक्कै प्रभावकारी भएको भीमेश्वर नगरपालिका उपमेयर कमला बस्नेतको भनाई छ । उहाँका अनुसार चालुु वर्ष भीमेश्वर नगरपालिका वडा नं ४ का महिलाहरुलाई पनि पञ्चेबाजा तालिम दिएको छ । उनीहरुपनि पञ्चेबाजा बजाउन सिपालु भइसकेका छन् ।

अहिले नगरले महिलाहरुका लागि सवारी चालक सम्बन्धी तालिम प्रदान गरिरहेको छ भने सुकुल र चप्पल बुन्ने,हाते होजियारी,मुढा बनाउने,व्युटी पार्लर,सिलाई,बुुटिक,धुप बनाउने,अचार बनाउने,झोल साबुन बनाउने लगायतका प्रत्यक्ष आयआर्जन गर्न सकिने तालिम प्रदान गरिरहेको छ । नगरले महिलालाई व्यवासायिक बनाउन तालिमसंगै आवश्यक सामग्रीहरुसमेत सहयोग गर्दै आएको भीमेश्वर नगरपालिका महिला शाखा प्रमुख सुर्जा दहालले बताउनुुभयो ।
नगरपालिकाले प्रदान गरेको सिलाई तालिमकै कारण आफुलाई जिविको पार्जनमा सहयोग पुुगेको भीमेश्वर नगरपालिका ४ की चन्द्रावती बस्नेतको भनाई रहेको छ । नगरले तालिम प्रदान नगरेको भए जीविकोपार्जनमा निक्कै समस्या हुुने समेत बताउनुभयो
नगरपालिकाले तालिम मात्रै दिएको छैन् उनीहरुलाई व्यवसाय सञ्चालन गर्नका लागि आवश्यक पर्ने सामाग्रीहरु पनि दिने गरेको छ । तीन महिने तालिमसँगै सिलाई व्यवसाय गर्नका लागि मिसिन पाएपछि व्यवसाय गर्न सहज भएको भीमेश्वर नगरपालिकाकी सुमीना थामीले खुसी व्यक्त गर्नुभयो ।
। नगरले स्थानीय स्रोत र साधनलाई परिचालन गर्दै आवश्यकताका आधारमा तालिम प्रदान गरेकाले  तालिम जीवनउपयोगी र प्रभावकारी पाइएको सामाजिक अभियन्त राजन बस्नेतको भनाइ छ ।

नगरपालिकाले आफनो वार्षिक निति तथा कार्यक्रममा व्यवस्था गरेरै क्षमता विकास तालिम प्रदान गर्दै आएको छ । नगरपालिकाले तालिम धेरैलाई प्रदान गरिएको र तालिमको प्रभावकारीता र थप आवश्यकता पहिचानका लागि नियमित अनुुगमन गरिरहेको भीमेश्वर नगरपालिकाका उपमेयर कमला बस्नेतले बताउनुुभयो ।
‘सिप ठाउँठाउँमा; लगानी मेरो गाउँमा’ भन्ने नारा बोकेको नगरले विदेशमा सिकेको सिप समेत भीमेश्वरकै भूमिमा प्रयोग गरी व्यावसायिक र आत्मनिर्भर बनाउन पहल गर्ने नीति लिएको छ । व्यवसाय गर्नेलाई आर्थिक अभाव हुन नदिने र सधै नगरले प्रोत्साहन गरिरहने नगर प्रमुुख ईश्वर नारायण मानन्धरको भनाइ छ ।

नगरपालिकाले प्रदान गरेको तालिमकै कारण धेरै नागरिकको जीविकोपार्जनमा सहयोग पुगेको छ । यसलाई थप प्रभावकारी बनाउनका लागि उत्पादनका क्षेत्रहरु पहिचान गरी स्थानीयको क्षमता,पूँजी र सिप अनुसारको कार्यक्रम सञ्चालन गर्न नगरले योजना बनाएर काम शुरु गरेको भीमेश्वर नगरपालिका वडा नं ४ का वडाध्यक्ष एवम नगरपालिकाका प्रवक्ता तारानाथ चौलागाईले बताउनुभयो ।