गौरीशङ्कर बहुमुखी क्याम्पस चरिकोटमा विद्यार्थीहरुका लागि परीक्षा सफलताको शुभकामना कार्यक्रम आयोजना गरिएको छ । क्याम्पसका कक्षा ११ का विद्यार्थीको आयोजनामा कक्षा १२ र स्नातक तह प्रथम वर्षका विद्यार्थीका लागि मायाको चिनोसहित शुभकामना कार्यक्रम आयोजना गरेको हो ।
क्याम्पस सञ्चालक समितिका अध्यक्ष अमृत राउतको प्रमुख आतिथ्यतामा सम्पन्न कार्यक्रममा प्रमुख अथिति राउतले परीक्षा सफलताको शुभकामना दिँदै सक्षम र प्रतिस्पर्धी विद्यार्थीको पहिचान बनाउन सुझाव दिनुभयो ।

कार्यक्रममा शुभकामना मन्तव्य राख्दै क्याम्पस प्रमुख शान्त केसीले शैक्षिक गुणस्तर अभिबृद्धिका लागि क्याम्पस योजनावद्धरुपमा अगाडि बढेको भन्दै मेहनत र अनुशासनका साथ क्याम्पसको अभियानमा साथ दिन आग्रह गर्नुभयो ।
गौरीशङ्कर बहुमुखी क्याम्पस विद्यार्थी गुणस्तर सर्कलका अध्यक्ष विरसम श्रेष्ठको अध्यक्षतामा सम्पन्न कार्यक्रममा कक्षा ११ का करिष्मा गोले र तृष्णा श्रेष्ठले शुभकामना मन्तव्य राखेका थिए भने कक्षा १२ का विमल खड्का र स्नातक तहका दावा तमाङले अनुभव र अनुभूतिसहित मन्तव्य व्यक्त गर्नु भएको थियो ।
कार्यक्रममा क्याम्पसका विद्यार्थीले विभिन्न नृत्य तथा गायन कार्यक्रमसमेत गरिएको थियो ।
क्याम्पसले कक्षा १२ बाट २ सय र स्नातक तह चौथो वर्षका १ सय २० जनालाई परीक्षा सफलताको शुभकामना दिएको हो ।