शिवाकोटी समाज नेपालले ६५ जना जेष्ठ नागरिकको एक साथ सम्मान गरेको छ । कालिञ्चोक गाउँपालिका ८ मा रहेको शिवाकोटीहरुको पूख्र्यौली थलो चौघरा दरबारको आँगनमा जेष्ठ नागरिकहरुको सम्मान गरिएको हो ।
शिवाकोटी समाज नेपाल दोलखाको प्रथम जिल्ला अधिवेशनको सन्दर्भ पारेर कार्यक्रमका प्रमुख अतिथि रहनुभएका शिवाकोटी समाज नेपालका केन्द्रिय अध्यक्ष जय प्रसाद शिवाकोटी,सहअध्यक्ष बालकृष्ण शिवाकोटी,उपाध्यक्षहरु रामकाजी शिवाकोटी, अशोक शिवाकोटी, चौघरा संरक्षण समितिका पूर्व अध्यक्ष गणेश प्रसाद शिवाकोटी, शिवाकोटी समाज नेपालका केन्द्रिय सदस्य बालगोपाल शिवाकोटी लगायतका केन्द्रिय नेतृत्व साथै जिल्ला तहका अभियन्ताको उपस्थितिमा ८० वर्ष उमेर लागेका जेष्ठ नागरिकलाई दोसल्ला ओढाएर सम्मान गरिएको हो ।

शिवाकोटी समाजले सबै शिवाकोटी समूदायका जेष्ठ नागरिकसहित साविक सुनखानीका सबै जाति र समूदायका जेष्ठ नागरिकको सम्मान गरेको शिवाकोटी समाज नेपालले जनाएको छ ।
शिवाकोटी समाज नेपालले ८० वर्ष उमेरदेखि सबैभन्दा जेष्ठ सदस्य ९९ वर्षीय विष्णुमाया शिवाकोटीसहित २५ बृद्धा र ४० बृद्धसहित ६५ जना जेष्ठ नागरिकको सम्मान गरेको हो ।
कार्यक्रममा वक्ताहरूले जेष्ठ नागरिकहरूको सम्मानबाट समाजमा असल संस्कार संस्थागत हुँदै जाने भएकाले सम्मान कार्यक्रम सुरु गरिएको बताउनुभयो । कार्यक्रमका वक्ताहरूले जेष्ठ सदस्यहरूको अनुभव इतिहास, संस्कृतिको संरक्षण र संवर्द्धन उपयोगी हुने धारणा राख्नुभयो । कार्यक्रममा दोलखा र रामेछापका शिवाकोटी बन्धु लगायत अन्य समूदायको समेत उल्लेख्य सहभागिता रहेको थियो ।

देशभर २ लाख ७५ हजार शिवाकोटीहरु रहेको समाजका केन्द्रिय सदस्य बालगोपाल शिवाकोटीले बताउनुभयो । दोलखाको सुनखानी उद्गम स्थल रहेको भारद्वाज गोत्रीय शिवाकोटीहरुको मुख्य बसोबास दोलखा,झापा,चितवन,मकवानपुर रहेको बताइएको छ ।
आज सम्पन्न पहिलो भेलाले रामबहादुर शिवाकोटीको अध्यक्षतामा ११ सदस्यीय शिवाकोटी समाज नेपाल दोलखा गठन गरेको छ । विभिन्न मौलिक भजनकृतन र लोकबाजाको धुनसहित कार्यक्रम सम्पन्न भएको आयोजकले जनाएको छ ।