दोलखा सदरमुकाम चरिकोटबाट जिल्लाभर सेवा प्रवाह गर्दै आएको हाम्रो जनकल्याण सहकारी २८ औं वर्षमा प्रवेश गरेको छ ।  २८ औं स्थापना दिवसको अवसर पाररे हाम्रो जनकल्याण सदस्य आवाज नामक वार्षिक बुलेटिन बिमोचनसहित स्थापना दिवस मनाएको हो । कार्यक्रमका प्रमुख अतिथिसमेत रहनु भएका भीमेश्वर नगरपालिकाका मेयर ईश्वर नारायण मानन्धरले उक्त पुस्तकको विमोचन गर्नुभएको थियो ।
सहकारीका शेयर सदस्यहरु मध्य सफल र उत्कृष्ट १० जना व्यवसायिका सफलताको कथा र अनुभव पुस्तकमा समावेश गरिएको सहकारीले जनाएको छ । दुग्ध उद्योग ,कुखुरापालन,गाईपालन तथा व्यावसायिक तरकारी खेती लगायतका सफलताका कथा पुस्तकमा समेटिएका छन् ।
स्थापना दिवसकै अवसर पारेर हाम्रो जनकल्याण सञ्चारकर्मी फेलोसीप प्राप्त गर्ने ४ पत्रकारहरु पुरस्कृत भएका छन् । सहकारी क्षेत्रका गतिविधि प्रचारप्रसारमा योगदान गरेको भन्दै पत्रकार बाबुराम शर्मा, केदार शिवाकोटी, दिलबहादुर केसी,सिर्जन घिमिरे र विनिता शिवाकोटीलाई पुरस्कृत गरिएको सहकारीका प्रमुख कार्यकारी अधिकृत दीपक बस्नेतले बताउनु भयो । सोही अवसरमा संस्थाका एक सय पाँच वर्षे शेयर सदस्य टेक बहादुर थापालाई जेष्ठ नागरिक सम्मान, आवाज नेपाल दोलखाकी अध्यक्ष सिर्जना कार्कीलाई हाम्रो जनकल्याण व्यक्तित्व सम्मान र हाम्रो जनकल्याण पूर्व सञ्चालक सम्मान कमल प्रसाद चौलागाई, उत्कृष्ट कर्मचारीका रुपमा सहायक पदमा कार्यरत सुनिता चौलागाई र बोच संस्कृति भजन मण्डलीलाई सम्मान गरेको छ ।
समृद्ध सदस्य, सर्वोत्कृष्ट सहकारी मूल नाराका साथ आयोजना गरिएको स्थापना दिवसको अवसरमा उद्यम प्रबर्धनका लागि अन्तक्र्रिया कार्यक्रमको समेत आयोजना गरिएको थियो ।
संस्थाका अध्यक्ष राजन श्रेष्ठको अध्यक्षतामा सम्पन्न कार्यक्रमका भीमेश्वर नगरपालिका मेयर ईश्वर नारायण मानन्धर, बागमती प्रदेश बचत तथा ऋण सहकारी संघ (प्रोस्कून) का महासचिव जिवसराज खडका, जिल्ला सहकारी संघ दोलखाका अध्यक्ष देवी प्रसाद शर्मा, दोलखा जिल्ला बचत तथा ऋण सहकारी संघकी सचिव शर्मिला सापकोटा, भीमेश्वर सहकारी सञ्जालका संयोजक कृष्ण बहादुर गौतम, नेपाल रेडक्रस सोसाइटी जिल्ला शाखा दोलखाका सभापति ईश्वरी प्रसाद दाहाल,हाम्रो जनल्याण सहकारीका सचिव अनिल रिजाल लगायतले शुभकामना मन्तव्य व्यक्त गर्नु भएको थियो ।
स्थापना दिवसमा सहकारीका उद्यमी शेयर सदस्य, पूर्वसञ्चालक तथा सञ्चालक सदस्यहरु, सल्लाहकार र उपसमिति सदस्यहरुको उपस्थिति रहेको थियो । वि.स. २०५४ साल बैशाख १७ गते स्थापना भएको हाम्रो जनकल्याण बचत तथा ऋण सहकारी संस्था लि. २८ औं वर्षमा प्रवेश गरेको छ ।