दोलखा सुनखानी सित्काकी मिरा खुलालको उपचारको लागि गौरीशङ्कर बहुमुखी क्याम्पस दोलखाले सहयोग अभियान शुरु गरेको छ ।
क्याम्पसमा विए तेस्रो वर्षमा अध्यययरत विद्यार्थीसमेत रहनुभएकी कालिञ्चोक ७ सित्का निवासी खुलालको उपचारमा सहयोग पुगोस भन्ने उद्देश्यले सहयोग सङ्कलन अभियान शुरु गरेको क्याम्पसले जनाएको छ ।
क्याम्पस सञ्चालक,प्राध्यापक,प्राध्यापक संघ,विद्यार्थी गुणस्तर सर्कल,पूर्व विद्यार्थी तथा विद्यार्थीहरुबीच सहयोगको आव्हान गरिएको क्याम्पस प्रमुख शान्त केसीले बताउनु भयो ।
३० वर्षकी खुलालको दुबै मृगौला फेल हुनुको साथै कलेजोमासमेत समस्या भएपछि उपचारमा सहयोग पुगोस भन्ने उद्देश्यले सहयोग सङ्कलन गरिएको हो ।
खुलालको लागि उहाँका बुबाको मृगौला र भाइको कलेजो प्रत्यारोपणका लागि सबै परीक्षण पुरा भएको र आजदेखि प्रत्यारोपणको प्रक्रिया शुरु हुने खुलालकी दिदी जमुना खुलालले बताउनुभयो । दिदी खुलालका अनुसार उपचारका लागि ५० लाखभन्दा बढी खर्च हुने छ । खर्च अभावमा उपचारमा बाधा नपुगोस भन्ने उद्देश्यले अहिले विभिन्न व्यक्ति तथा संघ संस्थाले आर्थिक सहयोग अभियान सञ्चालन गरिरहेका छन् ।