दोलखाको भीमेश्वर शिलामा पसिना आएपछि भोलि क्षमापुजा गरिने भएको छ । प्रसिद्ध दोलखा भीमेश्वरको शिलामा एक हप्ताको अवधिमानै तीन पटक पसिना आएपछि राष्ट्रको तर्फबाट र जनताको तर्फबाट क्षमा पूजा गरिने दोलखा भीमेश्वर गुुठी व्यवस्थापन समितिका अध्यक्ष भरत श्रेष्ठले जानकारी दिनुभयो । उहाँका अनुसार भोलि बिहान ७ बजे राष्ट्रको तर्फबाट राष्टिपतिको कार्यालयका प्रतिनिधि, प्रमुख जिल्ला अधिकारी र जनताको तर्फबाट जनप्रतिनिधि र गुुठी व्यवस्थापन समितिका पदाधिकारीबाट क्षमा पुजा गर्ने तयारी भई रहेको छ ।
भीमेश्वर मन्दिरको शिलामा गत शनिबार दुई पटक र बुधबार एक पटक गरि एक हप्तामानै तीन पटक पसिना आएको थियो । भीमेश्वरको शिलामा दायाँपट्टि पसिना आउँदा राष्ट्रप्रमुखलाई असर गर्ने र बायाँपट्टि पसिना आउँदा जनतालाई असर गर्ने जनविश्वास रहँदै आएको छ । शिलामा पसिना आउँदा शुभ या अशुभ दुवै खाले प्रभाव पर्न सक्ने स्थानीय ज्येष्ठ नागरिकहरुको भनाई छ । शिलामा पसिना आएपछि उक्त पसिना पुछेको कपास राष्ट्र प्रमुखलाई पठाउने र राष्ट्रप्रमुखको तर्फबाट क्षमापुजा गर्ने प्रचलन रहेको छ ।