दोलखा सदरमुकाम चरिकोटमा आजबाट श्रीमद्भागवत महापुराण सञ्चालन भएको छ । आज विहिबार घटस्थापनाको अवशर पारेर दोलखाका प्रमुख जिल्ला अधिकारी टुवराज पोखरेलले दीप प्रज्ज्वलन गरेर महापुराण कार्यक्रमको औपचारिक शुरुवात गर्नुभएको हो ।
विहान चरिकोट साटदोवाटोदेखि पाटीखोला, पशुपति डाँडाहुँदै पुराणस्थल सातदोवाटोसम्म कलश यात्रा पछि कार्यक्रमको विधिवत उद्घाटन गरिएको थियो । धार्मिक एकता र सामाजिक सद्भावसहित संस्कृतिको संरक्षण गर्ने उद्देश्यले वार्षिक रुपमा कार्यक्रम गर्न लागिएको आयोजक दुर्गा पूजा व्यवस्थापन समितिका संयोजक श्यामकृष्ण थापाको भनाइ छ ।
विजया दशमीको नवमीसम्म लगाइने श्रीमद्भागवत महापुराणमा पण्डित रामचन्द्र तिमल्सिना प्रमुख कथा वाचक र पण्डित हरि तिमल्सिना उप–वाचक रहनुभएको दुर्गा पूजा व्यवस्थापन समितिका कोषाध्यक्ष ऋषी प्रसाद न्यौपानेले बताउनुभयो ।
२४ गते दिउँसो ३ बजेबाट नौलाख दीप प्रज्ज्वलन र होमादी गरी आश्विन २५ गते तिलार्पण गरी कार्यक्रम समापन गरिने छ ।। गत वर्षपनि विजया दशमीको अवशरमा पुराण लगाइएको थियो । दोलखा उद्योग वाणिज्य संघ, नेपाल पत्रकार महासंघ, दोलखा,चेम्बर अफ कमर्श दोलखा जिल्ला निर्माण व्यवसायी संघको सहआयोजना रहेको छ ।