दोलखामा क्रियाशील पत्रकार समाज गठन गरिएको छ । चरिकोटमा आयोजित एक भेलाले विभिन्न सञ्चारमाध्यमका सम्पादक र पत्रकारहरुको सहभागितामा समाज गठन गरिएको हो ।
आवाज अनलाइनका सम्पादक एवम अग्रज पत्रकार शम्भु गौतम सल्लाहकार रहेको समाजमा कालिञ्चोक सन्देश साप्ताहिकका सम्पादक दिपक बस्नेत संयोजक रहनुभएको छ । समाजमा जिल्लाका साझा अर्थका सम्पादक नवराज शिवाकोटी, समदृष्टि अनलाइनकी सम्पादक निर्मला शिवाकोटी(विनिता),नेपाल टेलिभिजनका दोलखा सम्वाददाता मन्दिरा थापा, जागरण टाइम्सका सम्पादक बलराम शिवाकोटी, फ्रेन्डसिप खबरका सम्पादक राजकुमार दहाल, आवाज अनलाइनका राजनबहादुर शिवाकोटी र जागरण टाइम्सका प्रधान सम्पादक डम्बरप्रसाद चौंलागाई सदस्य रहनुभएको छ ।
नेपाल पत्रकार महासंघले सदस्यता शुद्धीकरणका नाममा वर्षौदेखि क्रियाशीले पत्रकारहरुलाई आफैंले बनाएको मापदण्ड विपरित सदस्यताबाट बञ्चित गरिएको भन्दै हामीपनि क्रियाशील छौ,कलम रोकिएको छैन र रोकिदैन भन्ने सन्देश दिन समाज गठन गरिएको समाजका संयोजक बस्नेतको भनाइ छ ।
आगामी दिनमा पनि विगतमा जस्तै स्वतन्त्र पत्रकारिताको मर्मलाई आत्मसात गर्दै आफ्नो कलमलाई अझै सशक्त ढंगले अगाडि बढाउने दोलखाका क्रियाशील पत्रकारहरुले प्रतिबद्धता जनाएका छन् । बुधबार नेपाल पत्रकार महासंघ दोलखा शाखाको सर्वसम्मत नेतृत्व चयन भएकै दिन दोखलामा क्रियाशील पत्रकारले समाज गठन गरेका हुन् ।