दोलखाको सुनखानीमा रहेको पवित्र वाणारसी धाममा आज सामुहिक तीर्थ श्राद्ध गरिएको छ । समाज विकास प्रतिष्ठानको आयोजनामा आज सोमबार पौषे औसीको अवशरमा सामुहिक श्राद्ध गरिएको हो । धर्म,संस्कार, परम्परा र रितिरिवाज संरक्षण तथा पितृ उद्दार एवम मोक्षका लागि सामुहिक तीर्थ श्राद्धको आयोजना गरिएको समाज विकास प्रतिष्ठानका उपाध्यक्ष शिवहरि शिवाकोटीले बताउनुभयो ।
समाज विकास प्रतिष्ठानमा १ सय ४१ सदस्य रहेका छन् । प्रत्येक सदस्यका पितृहरुको नाममा प्रतिष्ठानका अग्रज पुस्ताले अर्पण दिँदै सामुहिक श्राद्ध गर्ने प्रचलन रहेको प्रतिष्ठानले जनाएको छ ।पवित्र धार्मिक स्थल वाणारसी धाममा श्राद्ध सम्पन्न भएपछि सामुहिक पितृ प्रसाद ग्रहण गरिएको थियो ।

दोलखा सिगटी सडकसंगै जोडिएको कालिञ्चोक गाउँपालिका वडा नं ८ सोती वाणारसी सामुदायिक वन क्षेत्रमा रहेको पवित्र धार्मिक स्थल वाणारसीमा प्रत्येक १२ वर्षमा गोदावरी मेला लाग्ने गरेको प्रतिष्ठानका अगुवा शिवहरि शिवाकोटीको भनाइ छ । साविक सुनखानी (हालको वडा नं ७,८र ९) का स्थानीय समाज विकास प्रतिष्ठानमा जोडिएका छन् ।

अगुवा शिवाकोटीका अनुसार पहरा अन्तर भागबाट निस्किएको पानी वर्षभरि नै तातोपानी रहने पवित्र कुण्ड यहाँको महत्वपूर्ण विशेषता रहेको छ भने विभिन्न देवी देवताका निक्कै पुराना मूर्तीहरु रहेका छन् । आगामी २०८४ सालमा पर्ने वाणारसी गोदावरी मेलाका लागि १०८ धारा निर्माणको योजना समेत रहेको छ । यहाँ निक्कै ठूलो र पुरानो डुम्रीको रुख पहरोको फेद देखि सडकसम्म फैलिएको छ ।

वाणारसी धामलाई व्यवस्थित गर्न वडाले प्रयास गरेपनि प्रर्याप्त नभएको स्थानीयको भनाइ छ । समाज विकास प्रतिष्ठानले धर्म,संस्कृति संरक्षणसंगै आगलागी पिडीतलाई सयोग, विद्यार्थी छात्रवृत्ति लगायतका विभिन्न सामाजिक काम गर्दै आएकोसमेत जनाएको छ ।