भीमेश्वर नगरपालिका वडा नं ५ ले आयोजना गर्न लागिएको वडाध्यक्ष कपको तयारी पूरा भएको छ । माग १ गतेबाट बुढाभीमसेन खेल मैदानमा आयोजना गर्न लागिएको ‘वडा अध्यक्ष कप’ दोश्रो जिल्लाव्यापी मावि स्तरीय छात्र फुटबल प्रतियोगिता २०८१ को तयारी पूरा भएको वडाध्यक्ष बासु श्रेष्ठले बताउनुभयो ।
सोमबार विहान ११ बजेबाट शुरु हुने खेलको उद्घाटन कार्यक्रम वागमती प्रदेश सभा सदस्य भरत बहादुर केसीको प्रमुख आतिथ्यतामा सम्पन्न गरिने कार्यक्रम तय भएको खेल संयोजक तथा भिजन युथ क्लबका अध्यक्ष रबि बस्नेतको भनाइ छ । वडाभित्रका विद्यालयका छात्राहरुको उद्घाटन खेल,स्वागत गीत तथा नृत्य र विद्यार्थीको मार्चपास लगायतका कार्यक्रम रहेका छन् । उद्घाटनपछि निर्धारित खेलका कार्यक्रम शुरु हुने आयोजकको भनाइ छ ।
गत बर्षबाट सुरु भएको ‘वडा अध्यक्ष कप’ मा यस वर्षपनि जिल्लाभरबाट २० समूह खेलमा सहभागी रहने खेल संयोजक संस्था बुढाभीमसेन युवा क्लवका अध्यक्ष राजु नेपालीले जानकारी दिनुभयो ।
प्रतियोगिताको विजेताले ७५ हजार, उपविजेताले ४५ हजार, उत्कृष्ट खेलाडी २ हजार र सर्वाधिक गोलकर्तालाई २ हजार नगदसहित ट्रफी र मेडल प्रदान गरिने आयोजकले जनाएको छ ।
आगामी बर्षदेखि छात्राहरुको लागि समेत प्रतियोगिता सञ्चालन गर्ने योजना रहेको वडा अध्यक्ष श्रेष्ठले बताउनुभयो ।