कालिञ्चोक गाउँपालिमा सुनखानीमा गठन भएको भजन समूहले वाणारसी धाममा सामुहिक भजनकृतनको आयोजना गरेको छ । श्रृङ्गेश्वर भजन समूह र कालिन्चोक गाउँपालिका स्तरीय खैजडी मजुरा ,मृदङ्गा समूहल प्रत्येक हप्ता सामुहिक भजन कार्यक्रम सञ्चालन गर्दै आएको हो । ।

आफ्नो मौलिकता , धर्म , संस्कार , मुल्यमान्यता र मौलिक संस्कृति संरक्षण र हस्तान्तरणका लागि गाउँका पुराना कलात्मक , धार्मिक एवं साँस्कृतिक महत्वका स्थलमा भजनकृत गर्दै आएको समाजका अगुवा रामवहादुर शिवाकोटीले बताउनुभयो । उहाँका अनुसार शनिबार,विशेष पर्व र उत्सवको दिन पारेर सुनखानीका भजन कृतन समितिले भजन कृतन गर्दै आएको छ ।
सुनखानी सेरोफेरोका कालिनाग मन्दिर, चौघरा दरबार,शिवाकोटीहरुका पुर्खा गणेश बाट निर्माण भएको ऐतिहासिक कुटी परिसर,गणेशपाटी हुँदै शनिवार वाणारसी धाममा भजनकृतन गरिएको समुहका अगुवा झलक प्रसाद शिवाकोटीको भनाइ छ ।
भजन तथा खैजडी समूहले आगामी दिनमा कालिञ्चोक गाउँपालिका अन्तरगत पर्ने तामाकोशी,सिगटी,सुन्द्रावती लगायतका आधा दर्जन बढी घाटहरुमा पनि सामुहिक भजन किर्तन गर्ने कार्यक्रम रहेको छ ।
कालिञ्चोक गाउँपालिकामा गत कात्तिक महिनामा श्रृङ्गेश्वर भजन समूह र कालिन्चोक गाउँपालिका स्तरीय खैजडी मजुरा ,मृदङ्गा समूह गठन गरेको छ । जगत बहादुर आचार्यको अध्यक्षतामा गठन भएको उत्त समूहले निरन्तर भजनकृतका कार्यक्रम गर्दै आएको बताइएको छ ।