विद्यार्थीलाई रोजगार र व्यवसायमा जोड्न दोलखाका बैंक तथा वित्तीय संस्थाहरु सहमत भएका छन् ।

चरिकोटस्थित गौरीशङ्कर बहुमुखी क्याम्पस र जिल्लामा रहेका बैंक तथा वित्तिय संस्थाहरुबिच सहयोग आदानप्रदानको विषयमा शुक्रबार सम्पन्न छलफल कार्यक्रममा बैंक तथा वित्तिय संस्थाहरु सहयोग गर्न सहमत भएको क्याम्पस प्रशासनले जनाएको छ । बैठकमा क्याम्पस सञ्चालक समितिका अध्यक्ष अमृत राउतले बैंक तथा वित्तिय संस्थाहरुको सामाजिक उत्तरदायित्व अन्तर्गत खर्च हुने रकम क्याम्पसको छात्रवृत्ति अक्षयकोष लगायतका विषय मिल्ने शीर्षकमा सहयोग गर्न आग्रह गर्नुभयो ।

क्याम्पसमा अध्ययनरत विद्यार्थीहरुलाई रोजगार र व्यवसायमार्फत स्वरोजगार बनाउन सहयोग गर्ने उद्धेश्यले समन्वय बैठक आयोजना गरेर सहकार्यको सुरुवात गरिएको अध्यक्ष राउतको भनाई छ । त्यसैगरी क्याम्पस प्रमुख शान्त केसीले वाणिज्यशास्त्र तर्फका विद्यार्थीहरुलाई प्रशिक्षार्थीको रुपमा काम गर्ने मौका दिन र विद्यार्थीहरुलाई शैक्षिक कर्जा उपलब्ध गराएर व्यवसाय वा स्वरोजगारमा जोड्न पनि आग्रह गर्नुभएको छ ।

कार्यक्रममा जिल्लामा कार्यक्षेत्र रहेका विभिन्न बैंक, सहकारी संस्था, विमा कम्पनीका प्रमुख तथा प्रतिनिधिहरुले क्याम्पस नेतृत्वले गरेको अधिकांश प्रस्तावमा मिलेर अगाडि बढ्ने प्रतिबद्धता जनाएका छन् ।