गौरीशङ्कर बहुउद्देश्यीय सहकारी संस्था चरिकोटले चर्णावती जेष्ठ नागरिक धामलाई सहयोगी सामग्री वितरण गरेको छ । सहकारीले सामाजिक उत्तरदायित्व कार्यक्रम अन्तरगत ह्वील चियर र फोल्डिङ कम्मोड सहयोग गरेको हो । दोलखा सदरमुकाम चरिकोटबाट सेवा प्रवाह गर्दै आएको सहकारीका अध्यक्ष श्यामकृष्ण थापाले चर्णावती धामलाई आज एक कार्यक्रमका बीच उत्त सामग्री हस्तान्तरण गर्नुभएको संस्थाले जनाएको छ ।

सामग्री हस्तान्तरण गर्दै संस्थाका अध्यक्ष थापाले जेष्ठ नागरिकको आवश्यकतालाई मध्येनजर गर्दै जेष्ठ नागरिकको सहजताका लागि सामग्री हस्तान्तरण गरेको बताउनुभयो । आगामी दिनमा पनि संस्थाले यस्ता सहयोगलाई निरन्तरता दिने विश्वास व्यक्त गर्नुभयो ।
चर्णावती धाम सहजकर्ता रचना उप्रेतीले धामको आवश्यकतालाई सम्बोधन गरेको भन्दै सहकारी संस्थालाई धन्यवाद दिनुभयो । साथै धामका लागि आवश्यक पर्दा,सोलार वत्तीको समेत अत्यावश्यक भएकाले सहयोगी मनलाई सहयोगको लागिसमेत आव्हान गर्नुभयो ।

वित्तीय कारोबारमा मात्र केन्द्रित नभई सामाजिक क्षेत्रमा पनि संस्था क्रियाशील रहेको सहकारीका व्यवस्थापक मुकेश श्रेष्ठले बताउनुभयो । उहाँका अनुसार प्रत्येक वर्ष मानवसेवामा सहकारीले सहयोग गर्दै आएको छ । सामग्री हस्तान्तरण कार्यक्रममा सहकारीका सञ्चालकहरुको सहभागिता रहेको थियो ।