दोलखा सदरमुकाम चरिकोटमा रहेको गौरीश«ङ्कर बहुमुखी क्याम्पस चरिकोट दोलखामा सर्वसम्मत नेतृत्व चयन भएको छ । अनेरास्ववियूका सिरिष बस्नेतको नेतृत्वमा सर्वसम्मत स्ववियू चयन भएको हो ।
स्वतन्त्र विद्यार्थी यूनियन गौरीशङ्कर बहुमुखी क्याम्पसको निर्वाचन तालिकाअनुसार निर्धारित समयसम्म मनोनयन आव्हान गरिएको पदहरुमा एकल उम्मेदवारी मात्र दर्ता भइ कुनै पनि पदमा दावीविरोध समेत नपरेपछि १५ सदस्यीय स्ववियू निर्विरोध निर्वाचित भएकोे निर्वाचन अधिकृत बालकृष्ण फूँयालले बताउनुभयोे ।

स्ववियूको उपाध्यक्षमा नेपाल विद्यार्थी संघका डेनिस शिवाकोटी,सचिवमा नेपाल विद्यार्थी संघकै राजेन्द्र भुजेल,सहसचिव अखिल क्रान्तिकारीका राजकुमार भुजेल र कोषाध्यक्षमा अखिल क्रान्तिकारीकै कञ्चन तमाङ मोक्तान सर्वसम्मत निर्वाचित भएका छन् ।
त्यसैगरी समानुपातिकतर्फको सदस्यमा नेविसंघका सुरज नेपाली, अनेरास्ववियू (समाजवादी )का हेमन्त कुमार पाख्रिन,अनेरास्ववियू क्रान्तिकारीका शुशिल अधिकारी ,अखिल क्रान्तिकारी पृथ्वीराज तमाङ, अखिल नेपाल विद्यार्थी युनियन (समाजवादी) का सुस्मिता नेपाली निर्विरोध निर्वाचित भएको निर्वाचन समितिले जनाएको छ ।
प्रत्यक्षतर्फको सदस्यहरुमा अनेरास्ववियूका विमल खड्का,अखिल क्रान्तिकारीका पदम कुमारी बुढाथोकी,नेविसंघका राजन खड्की र सुरज नेपाली र अनेरास्वविय समाजवादीका भेष बहादुर बुढाथोकी र राष्ट्रिय स्वतन्त्र पार्टीका किशोर थामी निर्वाचित हुनु भएको हो ।