हरेक वर्ष संयुक्त राष्ट्रसंघको महासभा बैठकको क्रममा हुने दक्षिण एसियाली सहयोग संगठन सार्कका परराष्ट्रमन्त्रीहरुको साइडलाइन वार्ता यस वर्ष नहुने भएको छ ।

वार्तामा अफगानिस्तानको प्रतिनिधित्वको विषयमा सदस्य मुलुकहरुबीच कुरा नमिल्दा बैठक नहुने भएको बताइएको छ ।

सेप्टेम्बर २५ मा वार्ताको मिति तय भएपनि अहिलेलाई रद्ध गरिएको आयोजक मुलुक नेपालले अन्य मुलुकलाई जानकारी गराएको छ ।

काठमाडौंस्थित सार्क सचिवालयले सबै मुलुकलाई बैठक रद्ध गरिएको जानकारी गराइसकेको बुझिएको छ ।

हरेक वर्ष हुने सो बैठक सार्कलाई अगाडि बढाउने सम्बन्धमा छलफल हुने गर्दथ्यो ।

यस अगाडि भारत र पाकिस्तानको तनावको कारण कमजोर बनेको सार्कमा अब अफगानिस्तानको विषय पनि आएको छ ।

भारत र पाकिस्तानबीचको विवादले हाल सार्क निष्कृय जस्तै छ ।

पछिल्लोपटक २०७१ साल मंसिरमा नेपालमा १८ औं सार्क शिखर सम्मेलन भएको थियो ।

१९ औं शिखर सम्मेलन पाकिस्तानमा गर्ने निर्णय भए पनि अझैसम्म हुन सकेको छैन ।