दोलखाको भीमेश्वरको मन्दिरबाट मूर्ति चोरी भएको भीमेश्वर मन्दिर पुजा तथा गुठी व्यवस्थापन समिति दोलखाले जनाएको छ । राति करिब ११ बजेर १८ मिनेटको समयमा मन्दिरको परिसरमा च्यानल गेटबाहिर रहेको सरस्वतीको शीलाको मूर्ति चोरी भएको सिसिटिभीमा देखिएको भीमेश्वर मन्दिर पुजा तथा गुठी व्यवस्थापन समिति दोलखाका अध्यक्ष भरत श्रेष्ठले जानकारी दिनुभयो । उहाँका अनुसार मन्दिरमा नियमित शुभारम्भ पूजा गर्ने क्रममा बिहिबार विहान ५ बजे मन्दिरका पूजारीले मूर्ति चोरी भएको थाहा पाएपछि सरोकारवालालाई खबर गरेका थिए । घटनाबारे जानकारी पाए लगत्तै प्रहरीलाई खबर गरिएको र सिसिटीभीले कैद गरेको भिडियोबाट चोरी कार्यमा संलग्न व्यक्तिको पहिचान गर्न सजिलो हुने भएकोले सिसिटीभीको भिडियो जिल्ला प्रहरी कार्यालयलाई हस्तान्तरण गरिएको अध्यक्ष श्रेष्ठले वताउनुभयो । २०५१ सालमा मन्दिरको जिर्णोदारको बेला राखिएको सरस्वतीको मूर्ति चोरी भएको हो ।