निलकमल कृषि सहकारी संस्था कालिञ्चोक ८ सुनखानी दोलखाको आठौं वार्षिक साधारण सभाको अवसरमा भवनको उद्घाटन गरिएको छ । कार्यक्रमको अवसर पारेर कालिञ्चोक गाउँपालिका उपाध्यक्ष कालिका पाठकले संस्थाको नवनिर्मित भवनको उद्घाटन गर्नु भएको हो । कालिञ्चोक गाउँपालिकाको १० लाख र सहकारीको १९,५५,३७३ गरी करिब २९ लाखको लागतमा निर्माण सम्पन्न भएको २ तले पक्की भवनको उद्घाटन तथा सहकारीको स्थापना दिवस एकसाथ सम्पन्न गरिएको संस्थाले जनाएको छ । सहकारीलाई समाजसेवी बालकृष्ण शिवाकोटीले स्वर्गीय आमा बिष्णुमाया शिवाकोटी महिला उपचार कोषमा २०७४ सालमा जम्मा गर्नुभएको रु ५ लाख रुपैयाँ र कार्यक्रमको अवसरमा सोही दिन ५ लाख रुपैयाँ सहकारीलाई हस्तान्तरण गरी १० लाख सहयोग गरेको सहकारीले जनाएको छ ।
कार्यक्रममा संस्थाको आर्थिक तथा प्रगति प्रतिवेदन प्रस्तुत गर्नुका साथै उत्कृष्ट शेयर सदस्यहरुलाई सम्मानको कार्यक्रम आयोजना गरिएको थियो । संस्थाकी अध्यक्ष प्रतिमा शिवाकोटीको अध्यक्षतामा कार्यक्रम सम्पन्न भएको थियो । सहकारीमा
३२९ महिला शेयर सदस्य ,९२ पुरुष र २१४ बाल शेयर सदस्य गरि जम्मा १४२१ जना शेयर सदस्यहरु रहेका छन् भने कुल पुँजी २ करोड ३० लाख ६१ हजार ५ सय ८७ रुपैयाँ रहेको संस्थाकी अध्यक्ष प्रतिमा शिवाकोटीले जानकारी दिनुभयो ।