गौरीशंङ्कर बहुमुखी चरिकोट दोलखा अन्तरगत पब्लिक क्याम्पस प्राध्यापक संङ्घको अध्यक्षमा बालकृष्ण दहाल सर्वसम्मत निर्वाचित हुनु भएको छ । विहिबार साँझ सम्पन्न प्राध्यापकहरुको भेलाले ११ सदस्यीय प्राध्यापक संघ गठन गरेको हो । समितिको उपाध्यक्ष राजेश बस्नेत,सचिव सूर्य चौलागाई,सहसचिव तारा बहादुर महत,कोषाध्यक्ष निर्मला शिवाकोटी चयन हुनु भएको छ । यस्तै सदस्यहरूमा हिमलाल भण्डारी,ईश्वरप्रसाद चौलागाई,राजन कार्की,अर्जुन थापा,बालकृष्ण फूँयाल,निशा प्रधान रहनु भएको छ ।
कार्यक्रममा क्याम्पस सञ्चालक समितिका अध्यक्ष तथा कार्यक्रमका प्रमुख अतिथि राजेन्द्र मानन्धरलेगुणस्तरीय शिक्षाको सुनिश्चितता र क्याम्पसको सर्वपक्षीय विकासको लागि प्राध्यापक संघलाई हातेमालो गर्न आग्रह गर्नुभयो । क्याम्पसका सहप्राध्यापक र कर्मचारीको हक सुरक्षा गर्न सधै आफूले सकारात्मक पहल गर्ने प्रतिवद्धता व्यक्त गर्नुभयो । शुभकामना मन्तव्यका क्रममा क्याम्पस प्रमुख शान्त केसीले क्याम्पस प्रगतिको पथमा लम्किरहेको भन्दै आउने दिन अझै सुखद र प्रगतिशील बनाउन प्राध्यापकहरुको सर्वोपरी भूमिका रहने भन्दै सकारात्मक भुमिकाका लागि आव्हान गर्नुभयो । कार्यक्रममासहायक क्याम्पस प्रमुख सुवास रिमालले शुभकामना दिँदै प्राध्यापक संघसंग सर्वपक्षीय सम्बन्ध विकाससंगै शैक्षिक,भौतिक र प्रशासनिक विकासमा हातेमालो आवश्यक रहेको धारणा राख्नुभयो ।
कार्यक्रममा नवनिर्वाचित अध्यक्ष बालकृष्ण दहालले प्रतिवद्धता मन्तव्यका क्रममा क्याम्पसको शैक्षिक उन्ननय,पेशागत विकास र शैक्षिक गुणस्तरका लागि सकारात्मक सन्देश दिने गरी काम गर्ने वचन दिनुभयो । उहाँले भन्नुभयो “ पेशाप्रतिको कर्तव्यलाई धर्म ठान्दै,प्राज्ञिक मर्यादालाई कायम राखेर काम गर्छौ । क्याम्पसका असल योजनालाई सफल बनाउन रचनात्मक र समन्वयकारी भूमिका निर्वाह गर्नेछौ ।”
प्राध्यापक संघका जेष्ठ सदस्य हिमलाल भण्डारीको अध्यक्षतामा भएको कार्यक्रममा प्राध्यापक संघका कोषाध्यक्ष राजेश बस्नेतले आर्थिक प्रतिवेदन र सहसचिव सूर्य चौलागाईले प्रगति प्रतिवेदन प्रस्तुत गर्नुभएको थियो ।