२०७८ फागुन १

गौरीशंङ्कर बहुमुखी क्याम्पस चरिकोटले विद्यार्थीको सेवा सुविधालाई सहज बनाउन वडापत्र राखेको छ । क्याम्पसले विद्यार्थी केन्द्रित सेवा प्रवाहलाई पारदर्शी, जिम्मेवार र सरल अनि प्रभावकारी बनाउन वडापत्र सार्वजनिक गरेको क्याम्पसले जनाएको छ ।
प्रशासनिक भवन अगाडि व्यवस्थापन गरिएको वडापत्रको उद्घाटन क्याम्पस सञ्चालक समितिका अध्यक्ष राजेन्द्र मानन्धरले गर्नुभयो । वडापत्रको उद्घाटन गर्दै अध्यक्ष मानन्धरले विद्यार्थीको सुविधा र सहजताका लागि वडापत्र स्थापना गरिएको बताउनुभयो । विद्यार्थीको सेवा र सुविधाका लागि क्याम्पसले कुनै कसरत बाँकी नराख्ने धारणा राख्नुभयो । क्याम्पसबाट सेवा प्राप्त गर्ने विद्यार्थीले भर्नादेखि परीक्षा फारमसम्मको कार्यमा पु¥याउनुपर्ने प्रक्रिया,आवश्यक कागजात, लाग्ने शूल्क र तोकिएका सम्पर्क व्यक्ति र फोन नं समेत वडापत्रमा उल्लेख गरिएको छ ।
प्रशासनिक काम गर्न आवश्यक प्रक्रिया र सामग्रीका विषयमा विद्यार्थीमा अन्यौलता भएर झन्झट व्यहोर्नु पर्ने समस्याबाट मुक्त गर्न वडापत्रको स्थापना गरिएको क्याम्पस प्रमुख शान्त केसीले बताउनुभयो । क्याम्पसमा वडापत्र राखेपछि विद्यार्थी समेत खुसी भएका छन् । क्याम्पसले विद्यार्थीको सहजताका लागि गरेको प्रयासले अन्यौलमा पर्ने प्रशासनिक काममा सजिलो भएको विद्यार्थी सर्कलका संयोजक सुदाम दहालले बताउनु भयो ।
उद्घाटन कार्यक्रमसंगै क्याम्पसका विद्यार्थी सर्कलका पदाधिकारीसंग अन्तरक्रिया गर्दै क्याम्पस सञ्चालक समितिका अध्यक्ष राजेन्द्र मानन्धरले सञ्चालक समितिको निर्णयसमेत सुनाउनुभयो । यस अगाडिको कार्यक्रममा विद्यार्थीबाट आएका गुनासोलाई सम्बोधन गर्दै विद्यार्थीको मासिक शुल्कमा छुट गरिएको जानकारी गराउनुभयो । यसैबीच क्याम्पसका प्राध्यापक र क्याम्पस कर्मचारीको पारिश्रमिक समेत वृद्धि गरेको जानकारी गराउनु भएको हो ।
कार्यक्रममा क्याम्पस सञ्चालक समितिका सदस्य रमेश खतिवडाले कार्यक्रममा स्वागत मन्तव्य राख्दै देशकै उत्कृष्ट क्याम्पस बनाउने अभियानमा लागेको धारणा राख्नुभयो । कार्यक्रममा क्याम्पस सञ्चालक समितिका पदाधिकारी ,क्याम्पसका प्राध्यापक र क्याम्पस विद्यार्थी सर्कलका पदाधिकारीको सहभागिता रहेको थियो ।