२ चैत्र २०७८ ,

प्रमिला सेढाई

भीमेश्वर नगरपालिकामा अपाङ्गता भएका व्यक्तिहरुको वडा समिति गठन भएको छ ।
भीमेश्वर नगरपालिकाबाट समुदायमा आधारित पुर्नस्थापना कार्यक्रम अन्तर्गत भीनपा वडा नं ३ र ६ का अपाङ्गता भएका व्यक्तिहरुको भेलाले समिति गठन गरेको हो ।
भेलाले भीनपा वडा नं ३ मा रामकृष्ण तामाङको अध्यक्षतामा ७ सदस्यीय अपाङ्गता भएका व्यक्तिहरुको वडा समिति गठन गरिएको छ भने वडा नं ६ मा गणेश कुमार तामाङको अध्यक्षतामा वडा समिति गठन गरिएको छ ।
संस्थाका अध्यक्ष रामकृष्ण तामाङको अध्यक्षतामा सम्पन्न कार्यक्रममा भीमेश्वर नगरपालिकाका नगर प्रमुख भरत बहादुरकेसी,राष्ट्रिय अपाङ्गता महासंघका महासचिव राजु बस्नेत, भीमेश्वर नगरपालिका वडा नं ६ का वडाध्यक्ष नविन लामा,वडाध्यक्ष हरिशरण शिवाकोटी, भीनपाका वरिष्ठ कार्यक्रम अधिकृत नारायण प्रसाद सेढाई, महिला तथा बालबालिका शाखा अधिकृत सुर्जा दाहाल, ह्रयाण्डीक्याप इन्टरनेशनलका अञ्जना गुरुङले शुभ कामना दिनुभएको थियो ।
भीमेश्वर नगरपालिकाबाट समुदायमा आधारित पुर्नस्थापना कार्यक्रम अन्तर्गत सबै वडामा अपाङ्गता भएका व्यक्तिहरुको वडा समिति गठन गर्ने कार्यक्रम रहेकामा सबै वडामा वडा समिति गठनको कार्य पुरा भएको छ । निकट भविष्यमा नै पालिकास्तरीय समिति बनाउने योजना रहेको कुरा अधिकृत सुर्जा दाहालले बताउनु भयो । विशेषगरी अपाङ्गता भएका व्यक्तिहरुको अधिकारलाई सुनिश्चित गर्न, कार्यक्रममा एकरुपता कायम गर्न र अपाङ्गता भएका व्यक्तिहरुको आवाजलाई बलियो बनाउन वडा समिति गठन गरिएको छ । जसबाट कार्यक्रममा समन्वय र सहजिकरण गर्न र अधिकार उपभोगमा सहयोग पुग्ने विश्वास लिइएको छ ।
। अपाङ्गता तथा दृष्टिविहिन समुदाय सेवा संघ, दोलखाको आयोजना तथा भीमेश्वर नगरपालिकाको सहयोगमा कार्यक्रम सञ्चालन गरिएको हो ।