नेपालमा पुरुषभन्दा महिलाको जनसंख्या बढी भए पनि मतदातामा भने पुरुष बढी रहेका छन् । निर्वाचन आयोगले भर्खरै सार्वजनिक गरेको तथ्याङ अनुसार दोलखा जिल्लामा पनि महिला मतदाताको सङ्ख्या कम रहेको छ । आयोगका अनुसार दोलखामा ८० हजार ५ सय १७ पुरुष र ७९ हजार ५ सय ७९ जना महिला मतदाता रहेका छन् ।
दोलखा जिल्लामा भीमेश्वर नगरपालिकामा २६ हजार ८ सय ३३ जना,जिरी नगरपालिकामा १४ हजार ५८ जना, शैलुङ गाउँपालिकामा १९ हजार ३ सय ३०, कालिञ्चोक गाउँपालिकामा १८ हजार ६ सय ६१, मेलुङ गाउँपालिकामा १८ हजार १ सय ५३ तथा बैतेश्वर गाउँपालिकामा १७ हजार ४ सय ६२ जना मतदाता रहेका छन् । यसैगरी तामाकोशी गाउँपालिकामा १५ हजार ८ सय ३५ जना, गौरीशङ्कर १५ हजार ३ सय ४१ र विगु गाउँपालिकामा १४ हजार ४ सय २३ जना मतदाता रहेका छन्। ।
जिल्लामा सबैभन्दा बढी भीमेश्वर नगरपालिका र सबैभन्दा कम जिरी नगर रहेको छ । आगामी बैशाख ३० गते हुन लागेको स्थानीय तहको निर्वाचनका लागि दोलखामा १ लाख ६० हजार ९६ जना मतदाता रहेका छन् भने ९४ वटा मतदानस्थल र १ सय ९३ वटा मतदान केन्द्र निर्धारण गरिएको छ ।
आयोगका अनुसार ८९ लाख ९२ हजार १० जना पुरुष र ८७ लाख ४१ हजार ५ सय ३० जना महिला मतदाता छन् । २०७४ को स्थानीय तह निर्वाचनमा पुरुष मतदाता महिलाभन्दा ८६ हजार २६ जना धेरै थिए । कुल मतदाता पुरुष बढी भए पनि वाग्मती, गण्डकी र सुदूरपश्चिममा भने महिला मतदाता बढी छन् । प्रदेशगत रूपमा सबैभन्दा बढी मतदाता वाग्मती प्रदेशमा छन् । आयोगका अनुसार वाग्मतीमा ३४ लाख १२ हजार ८ सय ६९ जना छन् । यसमध्ये पुरुष १७ लाख ४ हजार ८ सय ९८ र महिला १७ लाख ७ हजार ९ सय ४२ जना छन् ।
प्रदेश १ मा ३३ लाख ४७ हजार ३ सय ८४ मतदाता रहेकामा पुरुष १६ लाख ९९ हजार र महिला १६ लाख ४७ हजार छन् । मधेस प्रदेशमा ३३ लाख ३१ हजार १ सय ७० मतदातामध्ये १७ लाख ९७ हजार ९ सय ४५ पुरुष मतदाता छन् । गण्डकीमा १७ लाख ८९ हजार ४ सय ११ मतदाता रहेकामा ८ लाख ६४ हजार ४ सय ५२ पुरुष र ९ लाख २४ हजार ९ सय ४८ महिला मतदाता छन् ।
लुम्बिनीमा ३२ लाख १९ हजार ४ सय ५७, कर्णालीमा १० लाख १ हजार २ सय ८२ मतदाता रहेको आयोगले जनाएको छ । सुदूरपश्चिममा १६ लाख ३२ हजार १ सय ५० मतदातामध्ये ८ लाख ६ सय ६२ पुरुष र ८ लाख ३१ हजार ४ सय ७० महिला मतदाता छन् ।