बिहान उठने बितिकै घर लिपपोतमा व्यस्त हुने दोलखाका महिलाहरु आजभोली फुसर्दिला देखिन थालेका छन ।
भुकम्पपछि दोलखामा मौलिकता झल्कने ढुङामाटोको घरहरु लोप भएपनि आधुनिक घर निर्माणसंगै महिलाहरु लिपपोतबाट भने मुक्ति पाएका हुन ।
भुकम्पपछि बनेका आधुनिक घरहरु सिमेन्ट प्लाष्ट्रर गरेर निर्माण गरेकाले रातोमाटो, गोबर, कमेरोको प्रयोग हराएको हो ।
रातोमाटो र कमेरो लिन जादा हरेक वर्ष मृत्युको खबरबाट भुकम्पपछि दोलखा मुक्त भएको छ ।
घर लिपपोतको लागी घण्टौ टाढा रातोमाटो खोज्न जाने महिलाहरु आजभोली गाउ÷घरमा हुने भेला बैठकमा सहभागी हुन फुर्सद समेत पाएका छन ।
२०७२को भुकम्पपछि ३ तल्ले ढुङामाटोको मौलिकता झल्कने घरहरु आजभोली गाउ÷घरमा देख्न मुस्किल पर्न थालेको छ ।
आधुनिक घर निर्माणसंगै ग्रामीण भेगका महिलाहरु लिपपोतबाट लाग्ने समय अन्य काममा खर्च गर्न थालेका छन ।
४ बजेदेखी उठेर घर पोत्नुपर्ने समस्याबाट अहिलेको छोरीबुहारीले मुक्ति पाएको बुढापाकाहरुको भनाई छ ।

दोलखामा भुकम्पपछिको ६ वर्षमा ६५ हजार ६ सय ६३ निजी आवास निर्माण भएको जिल्ला आयोजना कार्यन्वयन इकाई भवनले जनाएको छ ।