भानु विद्यापति साहित्य प्रतिष्ठान दोलखाको आयोजनामा गजल लेखन प्रशिक्षण कार्यक्रम आयोजना गरिएको छ । भाषा र संस्कृतिको संरक्षणका लागि बालबालिकासंग गजल जोड्ने उद्देश्यले प्रशिक्षण कार्यक्रमको आयोजना गरिएको हो ।
२ दिवसीय गजल प्रशिक्षण तथा साहित्य अभिमुखीकरण कार्यक्रमको उद्घाटन कार्यक्रममा बोल्दै भीमेश्वर नगरपालिका प्रमुख एवं प्रतिष्ठानका प्रमुख संरक्षक भरत केसीले भौतिक विकाससंगै कला,साहित्य र संस्कृतिको विकासले मात्र सम्बृद्धि सम्भव भएको धारणा राख्नुभयो । आजका पुस्तामा संस्कृति संरक्षणको महत्व बुझाउन भीमेश्वर नगरले संस्थागत रुपमा नै नयाँ कामको थालनी गरेको स्मरण गराउनुभयो । कार्यक्रममा मन्तव्य राख्दै भीमेश्वर नगरपालिका प्रमुख प्रशासकीय अधिकृत मान बहादुर खड्काले प्रशिक्षणले भाषा सस्कृतिको जगेर्ना गर्ने मात्र नभै मानवीय जीवनमा सकारात्मक प्रभाव पार्ने विश्वास व्यक्त गर्नुभयो ।

भानु विद्यापति साहित्य प्रतिष्ठान दोलखाका अध्यक्ष शङ्करलाल श्रेष्ठले अभिव्यक्तिसंग प्रकटीकरणको माध्यबाट चेतनाको विकास हुने र समाज रुपमान्तरणमा सहयोग पुग्ने धारणा राख्नुभयो । उहाँले दोलखा सम्बृद्ध बनाउन संस्कृति संरक्षणको भुमिका महत्वपूर्ण हुने बताउनु भयो ।
कार्यक्रममा गजलकार रुपक अलङ्कारले प्रशिक्षण दिइरहनु भएको छ । गजलकार जीत कार्कीले सहजीकरणमा सहयोग गर्नुभएको छ । प्रशिक्षण कार्यक्रममा दोलखाका विभिन्न विद्यालयका २५ जना भन्दा बढी विद्यार्थी र गजलमा रुचि राख्ने व्यक्तिहरुको सहभागिता रहेको प्रतिष्ठानका सदस्य सचिव सुन्दर खड्काले जानकारी दिनुभयो ।
कार्यक्रम भोलिसम्म चल्ने छ । यसैबीच प्रतिष्ठानको आयोजनामा शनिबार बेलुका ४ बजेदेखि दोलखा सदरमुकाम चरिकोटमा रहेको होटल एम्ब्रोसियामा गजल साँझ कार्यक्रम समेत आयोजना गरेको आयोजकको भनाई छ ।
भीमेश्वर नगरपालिकाले दोलखाको कला, साहित्य र संस्कृति संरक्षण र प्रवद्र्धनको लागि प्रतिष्ठान स्थापना गरेको छ । नगरपालिकाको नवौं नगरसभाले ऐन, कानुन पारित गरेपछि प्रतिष्ठानले पूर्णता पाएको हो। प्रतिष्ठान बनेपछि दोलखाको कला साहित्य र संस्कृति संरक्षणका लागि योजना निर्माण गरी कार्यक्रम गर्दै आएको छ ।