जनचाहना अनुसार गाउँको विकासका लागि उम्मेदवारी दिएको विगु गाउँपालिका अध्यक्ष पदका उम्मेदवार अच्युतम केसी (कटवालले) ले बताउनु भएको छ । प्रत्येक वडामा विपन्न बेरोजगार युवाको छनोट गरी आत्मनिर्भर बनाउन आधारभूतदेखि डिप्लोमासम्मको विभिन्न प्रकारका प्राविधिक सीप सिकाउने योजना रहेको कटवालले बताउनु भएको हो ।
राजनीतिक र सामाजिक अभियानको माध्यमबाट गाउँको विकासमा लाग्दै आउनु भएका कटुवालले विगु गाउँपालिकालाई दोलखाकै समृद्ध नमूना गाउँपालिका बनाउने प्रतिवद्धता गर्नु भएको छ ।
उहाँले भन्नुभयो,“जनतालाई खुसी र सुखी राख्नका लागि अध्यक्ष पदमा उम्मेदवारी दिएको छु । त्यस गाउँलाई सम्बृद्ध बनाउन योजना र सपनाहरु छन् । व्यवस्थित सडकमार्ग, धार्मिक पर्यटन विकास संगै वुद्ध दर्शन अध्ययन केन्द्रको रुपमा चिनाउने काम गर्ने छु ।”
कटवालले आलम्पुको ढुंगा खानीलाई आधुनिक व्यवस्थित उद्योगका रुपमा विकास गर्ने लक्ष्य भएको बताउनु भएको छ । यसै गरी मगर भाषा उत्थानको प्रयास गर्ने, चिलंखाको बुलुक्पामा रहेको चेन्चुङ मेन्दुङ गुम्बा र १२ सय पल्टन रहेको स्थललाई ऐतिहासिक तथा धार्मिक पर्यटकीय स्थलका रुपमा विकास गर्ने लक्ष्य समेत रहेको बताउनु भएको छ ।

कटवालको सामाजिक र राजनैतिक पहिचान
कटवालले तत्कालीन लादुक गाविसको शान्ती आदर्श माध्यमिक विद्यालयबाट माध्यमिक शिक्षा पुरा गर्नु भएको हो । वि.स. २०५६ सालबाट अनेस्ववियूमा आवद्ध हुदै कटवालले राजनीतिक जीवन सुरु गर्नुभएको हो । विगत २२ वर्षदेखि उहाँ निरन्तर राजनीति र सामाजिक क्षेत्रमा सक्रिय रहदै आउनु भएको छ ।
२०५६ साल प्रवेशिका परीक्षा उत्तीर्ण गरेका कटुवाल अहिले पार्टी आबद्ध जनवर्गीय संगठन नेपाल उद्योग व्यवसायी संगठनको स्थायी समिति सदस्य तथा वागमती प्रदेश ईन्चार्जका साथै नेपाल निर्माण सामग्री सम्बद्ध व्यवसायी संघ नेपालको केन्द्रीय उपाध्यक्षको भूमिकामा रहनु भएको छ ।
उहाँले निर्माण सम्बद्ध व्यवसायी संघ काठमाडौं जिल्लाको नेतृत्व समेत सम्हाली सक्नु भएको छ ।