विनिता शिवाकोटी

नेकपा एमाले भीनपा ५ का वडा अध्यक्ष पदका उम्मेदवार बासु श्रेष्ठले सरकारी सेवाको सुविधा वडाकै हितमा खर्च गर्ने उद्घोष गर्नु भएको छ । भीमेश्वर नगरपालिका वडा नं ५ घोक्सिला निवासी अध्यक्षका उम्मेदवार श्रेष्ठले आफू निर्वाचित भएपछि सरकारको तर्फबाट पाउने मासिक रकम वडाकै विकास र सामाजिक काम गर्ने बताउनु भएको छ ।
स्थानीय तह निर्वाचन २०७९ मा निर्वाचित भए सरकारबाट प्राप्त हुने रकम सामाजिक कार्यमा खर्च गर्ने प्रतिवद्धता व्यक्त गर्नु भएको छ । उहाँले भन्नुभयो,“आफूले प्राप्त गर्ने मासिक रकमबाट आर्थिक अवस्था कमजोर भएका परिवारलाई सहयोग गर्ने छु । विपन्न परिवारका विद्यार्थीको लागि छात्रवृत्ति कोष स्थापना गर्ने,आवश्यकताअनुसारका सामाजिक काम गर्ने छु ।”
वडाको सामाजिक,आर्थिक, भौतिक पूर्वाधार र पर्यटन विकासलाई प्राथमिकतामा राखेर काम गर्ने योजना बनाउनु भएको छ । सबैको सहमतिको आधारमा पायक पर्ने स्थानमा सुविधासम्पन्न भवन निर्माणदेखि वडाभित्रका सबै सडक कालोपत्रे गर्ने श्रेष्ठको योजना रहेको छ ।
यस अगाडि पनि वडाध्यक्ष पदका उम्मेदवार श्रेष्ठले गाउँको विकास र उत्थानका लागि सामाजिक सेवाका कार्य गर्दै आउनु भएको छ ।