नेपाल सरकारले प्राथमिकतामा राखेको दोलखाको फिल्म सिटी निर्माणको लागी यो वर्षको बजेटमा पनि निरन्तरता दिइएपछि स्थानीय बासी फिल्म सिटी दोलखामा नै बन्नेमा आशावादी बनेका छन ।
दोलखामा फिल्म सिटी र काभ्रेमा इन्डोर स्टुडियो निर्माण गरिने आइतबार आगामी आर्थिक वर्षका लागी बजेट सार्वजनिक गदै अर्थमन्त्री जर्नादन शर्माले जानकारी दिनुभएको हो ।
यसअघिको सरकारले १२ करोड ४५ लाख खर्च गरेर २ लेनको सडक, फुट ट्रेल, नाला सहितको पुर्वाधार निर्माण गरिसकेको छ भने बाग्मती प्रदेश सरकारले यो वर्ष ३ करोड ५० लाख रकम विनियोजन गरी काम गरिरहेको छ ।
निजी –सार्वजनिक साझेदारीमा फिल्म सिटी निर्माण हुने बजेटमा उल्लेख गरेको छ ।
फिल्म सिटी दोलखामा नै बनाउन सरकारले पहल गरेकोमा स्थानीय बासी खुसी हुनुको साथै पर्यटन प्रवद्र्धनमा समेत टेवा पुग्नेमा स्थानीयबासी आशावादी बनेका छन ।
भिमेश्वर नगरपालिका वडा नम्बर ९ डाङडुङेडाडामा रहेको फिल्म सिटीका लागी भिमेश्वर नगरपालिकाले ठेक्का मार्फत तालिम हल, सुचना गृह, प्रशासनिक भवन, गेट र गेष्ट हाउस निर्माणको काम गरिरहेको छ ।
७० अर्ब भन्दा माथीको लगानी लाग्ने भएकाले प्रदेश सरकार र संघीय सरकारले यसलाई प्राथमिकता दिएर बजेट विनियोजन गर्न स्थानीय सरकार प्रमुखहरुले माग गदै आएका थिए ।
३ हजार ४ सय मिटरको उचाइमा रहेको फिल्म सिटीबाट जुगल हिमश्रृङखला र रोल्वालिङ हिमश्रृङखलाको अवलोकन गर्न सकिने स्थानीयको भनाई छ ।
१ करोडको लागतमा पानी र बिजुलीको समेत व्यवस्था भइसकेको फिल्म सिटीका परिकल्पनाकार एवम अभियन्ता मदनदास श्रेष्ठले बताउनुभयो ।
नेपाल सरकारले प्राथमिकतामा राखेको नेपालकै पहिलो र एकमात्र प्रस्तावित फिल्म सिटीको विस्तृत आयोजना प्रतिवेदन डिपिआर तयार भइसकेको छ ।