दोलखा,२०७९

नेकपा माओवादी केन्द्र दोलखाको बैठकले नवनिर्वाचित जन प्रतिनिधिहरुलाई जनताको शासक नभई सेवक बनेर जनअपेक्षाअनुसार काम गर्न  निर्देशन दिएको छ । भर्खरै सम्पन्न स्थानीय तहको निर्वाचनमा नेकपा माओवादी केन्द्रलाई विजयी गराउन योगदान दिने व्यक्ति तथा संस्थालाई धन्यवाद दिने,पार्टीको तर्फबाट निर्वाचित उम्मेरदवारलाई शुभकामनासहित सम्मान व्यक्त गर्ने निर्णय गरेको हो ।
यसैबीच नेकपा माओवादी केन्द्र दोलखाले अव हुने जिल्ला समन्वय समिति दोलखाको निर्वाचनमा गठबन्धन दलमा भएको पूर्व सहमति कार्यान्वयनका लागि लाग्ने निर्णय गरेको छ । नेकपा माओवादी केन्द्रको बुधबार सदरमुकाम चरिकोटमा सम्पन्न बैठकले स्थानीय तहको निर्वाचनमा गठबन्धन सफल भएको भन्दै जिल्ला समन्वय समिति गठनमा पूर्व सहमति कार्यान्वयनका लागि लाग्ने लगायतका निर्णय गरेको पार्टीका संयोजक कुल बहादुर बुढाथोकीले हस्ताक्षर गरेको प्रेस विज्ञप्ति मार्फत जानकारी गराईएको हो ।

२०७९ सालको स्थानीय तह निर्वाचनमा दोलखामा माओवादी केन्द्रले ९ वटा पालिकामा ३ पालिका अध्यक्ष र एक उपाध्यक्ष तथा ७४ वडा मध्य २२ वडामा जित हासिल गरेको छ ।