२०९ औं भानु जयन्तीको अवसरमा दोलखामा रामायण वाचन प्रतियोगितासंगै दुई पुस्तक एक साथ विमोचन भएका छन् । भानु–विद्यापति साहित्य प्रतिष्ठान, दोलखा र विष्णुलक्ष्मी साहित्यिक पुरस्कार समितिको आयोजनामा भानु जयन्ती समारोह, रामायण वाचन प्रतियोगिता तथा दोलखा साहित्य यात्रा–३ र बालकृष्ण थपलियाद्वारा लिखित नेपालको चिनारी नामक काव्य विमोचन गरिएको हो ।

कार्यक्रमलाई सम्बोधन गर्दै जिल्ला समन्वय समिति दोलखाका प्रमुख तथा कार्यक्रमका प्रमुख अतिथि बर्जुराम घतानीले साहित्यले समाज चिनाउने मात्र होइन स्रष्टा बाच्ने काम गर्नु पर्ने धारणा राख्नुभयो । साथै साहित्य लेख्नेले लेखिएका विषयवस्तुलाई व्यवहारमा लागू गर्न पनि सुझाव दिनुभयो ।
कार्यक्रममा शुभ कामना मन्तव्य राख्दै भीमेश्वर नगरपालिकाका प्रमुख इश्वर नारायण मानन्धरले नेपाली कला,साहित्य र संस्कृतिको गरिमा बचाउन नगरपालिकाले प्रयत्न गरिरहने विश्वास व्यक्त गर्नुभयो ।
कार्यक्रममा दोलखाका प्रमुख जिल्ला अधिकारी भोजराज खतिवडा,भीमेश्वर नगरपालिका उपप्रमुख कमला बस्नेत, नगरपालिकाका प्रमुख प्रशासकीय अधिकृत मान बहादुर खड्का,नेपाल पत्रकार महासंघ दोलखा शाखाका अध्यक्ष दीपशंकर चौलागाई,विष्णुलक्ष्मी साहित्यिक पुरस्कार समिति दोलखाका अध्यक्ष विष्णु सुवेदी लगायतले भानुभक्तीय रामायणको महत्व र यसले समाजमा पारेको प्रभावका विषयमा चर्चा गर्नुभयो ।
कार्यक्रममा ७ जना जेष्ठ नागरिक,३ जना युवा र ११ जना बालबालिका(४समुह) ले रामायण वाचन गरेका थिए । रामायण वाचन प्रतियोगितामा ८२ वर्षका गंगाधर रेग्मी र ८९ का गौरीकान्त ढुङ्गेललाई सम्मान गरेको छ ।
यसैबीच जेष्ठ र युवा समुहको तर्फबाट दोलखा शैलुङ फस्कुका जेष्ठ नागरिक बलराम बुढाथोकी र केदार पाण्डे प्रथम हुनु भएको छ भने शैलुङकै ७९ वर्षीय केशर बहादुर बस्नेत द्वितीय स्थान हासिल गर्न सफल हुनु भएको छ । युवा गायत्री लामिछानेले तृतीय स्थान हासिल गर्नुभयो भने जेष्ठ नागरिक इन्द्रमाया सापकोटाले सान्त्वना स्थान प्राप्त गर्नुभयो ।
यसैगरी बालबालिका बीच भएको प्रतिस्पर्धामा बुढाभीमसेन माध्यमिक विद्यालय धरमघरका बालबालिका प्रथम,कुटीडाँडा माध्यमिक विद्यालय मकैबारीका बालबालिका द्वितीय र भीमेश्वर नगरपालिका वडा नं ५ धरमघरका बालबालिकाको समुह तृतीय भएका छन् ।
कार्यक्रममा जनप्रतिनिधि,कला साहित्य,संस्कृतिसंग सम्बन्धित संघसंस्थाका प्रमुख एवं प्रतिनिधि,साहित्यकार,साहित्यानुरागी लगायतको बाक्लो उपस्थिति रहेको थियो ।