गौरीशङ्कर बहुमुखी क्याम्पस चरिकोट दोलखामा रुपा स्मृति पुस्तकालय हस्तान्तरण कार्यक्रम सम्पन्न भएको छ । रुपा स्मृति फाउण्डेशनको सहयोगमा निर्माण सम्पन्न ‘रुपा स्मृति पुस्तकालय’ सोमबार एक कार्यक्रमको आयोजना गरी गौरीशङ्कर बहुमुखी क्याम्पस चरिकोट,दोलखालाई हस्तान्तरण गरेको हो ।
गौरीशङ्कर बहुमुखी क्याम्पसका संस्थापक अध्यक्ष समेत रहनुभएका फाउण्डेसनका संयोजक आत्माकृष्ण श्रेष्ठले क्याम्पस सञ्चालक समिति अध्यक्ष राजेन्द्र मानन्धरलाई हस्तान्तरणपत्र प्रदान गरी पुस्तकालय हस्तान्तरण गर्नुभएको थियो । पुस्तकालय हस्तान्तरण कार्यक्रमलाई सम्बोधन गर्दै फाउण्डेशनका संस्थापक संयोजक श्रेष्ठले पठन संस्कृति हराउँदै गएकोले यसको विकासका लागि पुस्तकालय निमार्ण गरेको बताउनुभयो । उहाँले भन्नुभयो,“पुस्तकालय खुल्ला विश्वविद्यालय हो । जसले पनि प्रयोग गर्न सक्छन् ।”
क्याम्पसबाट उत्पादन हुने जनशक्ति राष्ट्रिय र अन्तराष्ट्रिय स्तरसम्म प्रतिस्पर्धा गर्न सक्ने बनाउन क्याम्पसलाई सुझाव दिनुभयो । क्याम्पसका संस्थापक अध्यक्ष समेत रहनु भएका श्रेष्ठले क्याम्पसको उनन्नयका लागि निरन्तर सहयोग गर्ने प्रतिवद्धता समेत व्यक्त गर्नुभयो ।

कार्यक्रममा भीमेश्वर नगर प्रमुख इश्वरनारायण मानन्धरले क्याम्पसको शैक्षिक विकासका लागि नगरपालिकाले निरन्तर सहयोग गर्ने बताउनुभएको छ ।
कार्यक्रममा बोल्नुहुँदै क्याम्पस सञ्चालक समितिका अध्यक्ष राजेन्द्र मानन्धरले अवको लक्ष्य भनेको शैक्षिक गुणस्तर बृद्धि रहेको । साथै आजको पुस्ताले खोजेको डिजिटल र सुविधा सम्पन्न पुस्तकालयको स्थापना गर्नेसमेत प्रतिवद्धता जनाउनु भयो । अध्यक्ष मानन्धरले प्रतिस्पर्धात्मक शिक्षामा अगाडि बढ्न विद्यार्थीलाई आग्रह समेत गर्नुभयो ।
रुपा स्मृति फाउण्डेसन र गौरीशङ्कर बहुमुखी क्याम्पसबिच २०७८ चैत्र १५ गते भएको सम्झौता बमोजिम फाउण्डेसनले २५ लाख रुपैयाँको लागतमा पुस्तकालय कक्ष निर्माण गरेर क्याम्पसलाई हस्तान्तरण गरेको क्याम्पस प्रमुख शान्त केसीले जानकारी दिनुभयो । गौरीशङ्कर बहुमुखी क्याम्पस सभा सदस्य तथा क्याम्पसका संस्थापक अध्यक्ष आत्माकृष्ण श्रेष्ठकी पत्नी समाजसेवी तथा शिक्षाप्रेमी स्वर्गीय रुपा श्रेष्ठको स्मृतिमा फाउण्डेसनले पुस्तकालय निर्माण गरेको क्याम्पस प्रमुख केसीको भनाई छ ।