दोलखाका विभिन्न विद्यालयमा योग शिक्षा कार्यक्रम सञ्चालन गरिएको छ । पतञ्जली योग समितिका केन्द्रिय युवा संयोजक लोकनाथ खनालले दोलखाका विभिन्न बालबालिकालाई योगको शैद्धान्तिक एवं व्यावहारिक ज्ञान दिनु भएको हो ।
दोलखा भीमेश्वर नगरपालिकामा रहेका कुँटीडाँडा माध्मिक विद्यालय,महेन्द्रदयो मावि,बुढाभीमसेन माध्यमिक विद्यालय,भीम मावि,त्रिपुरा बोर्डिङ लगायत गौरीशंकर बहुमुखी क्याम्पस दोलखाका विद्यार्थीलाई योग शिक्षासंगै अभ्यास गराउनु भएको छ ।

बालबालिकालाई संस्कारी बनाउन योग शिक्षाको महत्व रहेको योग गुरु खनालको भनाइ छ । विद्यार्थीका लागि मनलाई एकाग्र बनाउने योग बढी प्रभावकारी हुने उहाँको भनाइ छ ।

दोलखा सदरमुकाम चरिकोटमा रहेको आयुरवेद कार्यालय र आइओएमको हलमा दैनिक विहान बेलुका योग कक्षा सञ्चालन गर्दै आउनु भएका योग गुरु खनालले वाँकी समय विभिन्न विद्यालय,क्याम्पस,सरकारी कर्मचारी,सेना,कारागारका कैदी बन्दी समेतलाई योग र योगको महत्वका विषयमा जानकारीसंगै योग अभ्यास गराउँदै आउनु भएको छ ।
योग गुरु खनाल भन्नुहुन्छ ‘योग चिकित्सा पद्धति हो –रोगीका लागि,योग जीवन हो– निरोगीका लागि,योग साधना हो –योगीका लागि र योग सबैका लागि ।’

योगको जीवनशैली अपनाए जीवन सार्थक हुने छ । योग गर्नेको जीवन शैली आफै परिवर्तन हँुदै जान्छ । योग सजगता हो,सबै काममा सजगता आवश्यक छ, त्यसैले सबैले योगको अवलम्बन गर्न जरुरीभएको खनालको भनाइ छ ।
‘प्राणायामले शरीरमा अक्सिजनको प्रवाह बढाएर छाला र श्वास–प्रश्वाससम्बन्धी रोग, क्यान्सरलगायतका जटिल रोगबाट जोगाउँछ वा यसको विस्तारलाई कम गर्छ ।’ योगअन्तर्गतको ध्यानले हाल समाजमा अत्यधिक देखिन थालेको उदासीपन, तनाव र छटपटी आदि कम गर्ने उहाँ बताउनुहुन्छ ।