दोलखाको मैनापोखरी स्थित जनसचेतन बचत तथा ऋण सहकारी संस्थाले धितो लिलामी गरेको छ ।
वैतेश्वर गाउँपालिका ५ मैनापोखरीमा रहेको केन्द्रिय कार्यालयमा धितो लिलामी गरेको हो । सहकारीले पटक पटक सूचना जारी गरेर ऋण तिर्ने प्रक्रियामा ल्याउन प्रयत्न गर्दा पनि सफल नभएपछि ८ जना ऋणीहरुको धितो लिलाम गरेको सहकारीका प्रमुख कार्यकारी अधिकृत नवराज दहालले वताउनुभयो ।
सहकारीले भदौ २१ गते नै ऋणीहरुको धितो लिलाम विक्री सम्बन्धी सूचना जारी गरेको थियो । सूचना जारीसंगै भाखा नाघेका ६ जना ऋणीहरुले ऋण तिरेका थिए भने वाँकी ८ जना भने सम्पर्कमा नआएपछि धितो लिलाम विक्री गरिएको संस्थाले जनाएको छ ।
ऋण लिने समयमा तय गरिएको शर्त अनुसार समयमा साँवा र ब्याज नबुझाउने, पटक पटक लिखित, मौखिक तथा भौतिक ताकेताको बेवास्ता गर्ने, राष्ट्रिय दैनिकमा सूचना प्रकाशन गरी ऋण तिर्न आह्वान गर्दा समेत ऋण नतिर्ने ऋणीहरुको धितो लिलाम बढाबढको आधारमा गरिएको संस्थाले जनाएको छ ।
ऋण लिदाका बखत तय गरिएको सेवा तथा शर्तनामा अनुसार समयमा ऋणको साँवा, ब्याज र हर्जना नबुझाउने, पटक पटक गरिएको ताकेता पश्चात पनि ऋण नतिरेमा सहकारी ऐन २०७४ को दफ ७९, सहकारी नियमावली २०७५ को दफा ३० बमोजिम कुनै पनि सहकारी संघसंस्थाले ऋणीको धितो लिलाम गरी ऋण असुलउपर गर्न सक्ने व्यवस्था छ ।
सहकारीका अध्यक्ष हेमन्त चौलागाईँका अनुसार ऋण नतिर्ने थप ऋणीहरुको पनि तीनपुस्ते विवरण सहितको ३५ दिने सूचना निकट भविष्यमै राष्ट्रिय दैनिक पत्रिकामा निकाल्ने तयारीमा संस्था रहेको छ । सरकारले सहकारी क्षेत्रका लागि निर्धारण गरेको सबै कानुनको उच्चतम पालना हुनेगरी संस्थामा भाखा नाघेको ऋण कम गर्न जनसचेतनले कुनै कसर बाँकी राख्ने छैन् ।