दोलखाको विकट मानिने उत्तरी क्षेत्रमा सहकारीले बैकिङ सेवा दिन लागेपछि स्थानीयलाई निक्कै सहज भएको छ । जनसचेतन बचत तथा ऋण सहकारी संस्थाले उत्तरी क्षेत्रमा सेवा केन्द्रमार्फत प्रविधिको प्रयोग गरी सेवा दिन लागेपछि निक्कै सहज भएको शेयर सदस्यले बताएका छन् ।
जिल्लाकै अति दुर्गम मानिएको विगु गाउँपालिका १ स्थित लामाबगरको जगतमा स्थापना भएको सेवा केन्द्र मार्फत विगत ३ वर्षदेखि वैकिङ कारोबार गर्न पाएपछि निक्कै सहज भएको शेयर सदस्य यादव आचार्यको भनाइ छ । सेवा केन्द्र नहुँदा निक्कै सास्ती थियो । पैसा राख्न होस् या झिक्न दिनै माया मारेर सिंगटी वा चरिकोट पुग्नु पथ्र्यो । अहिले आफू जहाँ पुगेपनि सजिलै सेवा पाएकोमा सेवा केन्द्रका शेयर सदस्य सबै खुसी छन्, उहाँले भन्नु भयो ।
छिटो, छरितो र आधुनिक बैंकिङ सेवा प्रभावकारी बन्दै गएको छ, सिंगटी सेवा केन्द्रकी शेयर सदस्य विना कार्कीको भनाइ छ ।
सहकारीले सेवा केन्द्र सञ्चालन नगर्दासम्म ऋण लिनको लागि साहुकोमा पटक पटक कोशेली लानु पर्ने वाध्यता थियो अहिले त्यो वाध्यता पूर्ण रुपमा हटेको लामाबगरकी जुना ठकुरी वताउँनुहुन्छ ।
जनसचेतन सहकारीले उत्तरी क्षेत्रलाई लक्षित गरेर ५ वटा सदस्य मैत्री सेवा केन्द्र मार्फत सेवा प्रदान गर्दै आएको छ । गौरीशंङ्कर गाउँपालिकाको इविथान सुरी सेवा केन्द्र,विगु गाउँपालिकाको सिँगटी सेवा केन्द्र,साङ्वा सेवा केन्द्र,जगत सेवा केन्द्र र कालिञ्चोकको बाबरे सेवा केन्द्र मार्फत सेवा प्रदान गर्दै आएको सहकारी संस्थाका अध्यक्ष हेमन्त कुमार चौलागाईँले जानकारी दिनुभयो । उहाँका अनुसार बैकिङ कारोबार,आइएमइ सेवा लगायतका प्रविधिमैत्री सेवा प्रदान गर्दै आएको छ ।
उत्तरी क्षेत्रका ५ वटै सेवा केन्द्रमा प्रविधिमैत्री सेवा मध्ये सबैभन्दा बढी आइएमइ सेवा शेयर सदस्यले लिने गरेको जगत सेवा केन्द्रका प्रमुख निर्मला पाण्डेले बताउनुभयो ।
उत्तरी क्षेत्रका अधिकाशं मानिसहरु वैदेशिक रोजगारमा रहेका छन् । विदेमा रहेका वा गाउँमै हुनेहरुका लागि पनि आइएमइ सेवा बढी प्रभावकारी भएको शेयर सदस्यले बताएका छन् ।

बाबरे सेवा केन्द्रमा मात्र चालु आर्थिक वर्षको अहिलेसम्म ८ सय ४० जनाले आइएमइ सेवा लिएका छन् भने ३४ जनाले वैकिङ कारोबार गरेको सेवा केन्द्रका प्रमुख लक्ष्मी थापाको भनाइ छ । थापाका अनुसार सेवा केन्द्र अन्तरगत कालिञ्चोक गाउँपालिकाको वडा नं १ र २ का ११ सय ७० जना शेयर सदस्य रहेका छन् । सेवा केन्द्र अन्तरगत १० वटा महिला लघुउद्यमी समुह सञ्चालन भइरहेका छन् ।
लघुउद्यम समुह मार्फत उद्यमी बन्न चाहने महिलाहरुलाई विना धितो ऋण प्रवाह गर्दै आएको छ । यसैगरी गौरीशंकर गाउँपालिकाको वडा नं ८र ९ र विगु गाउँपालिकाको वडा नं १ र २ सेवा क्षेत्र रहेको जगत सेवा केन्द्र मार्फत ६५ देखि ७० जनाले मासिक आइएमइ सेवा लिने गरेका छन् । जगत सेवा केन्द्र अन्तरगत ७ सय ४५ शेयर सदस्य रहेका छन् ।
जनसचेतन सहकारीले १६ वटै सेवा केन्द्र मार्फत प्रविधिमैत्री सेवा प्रदान गर्दै आएको छ । दोलखाको दुर्गम मानिएका गाउँवस्तीमा यो सेवा लोकप्रिय भएको शेयर सदस्यको अनुभूति छ ।
खल्तीमा पैसा पनि बोक्ने कार्ड पनि बोक्ने प्रचलनलाई सहकारीको प्रविधिले अन्त्य गरेको छ । अहिले एटिएममा गएर पैसा निकाल्ने अनि पसलमा गएर त्यहि पैसाले रिचार्ड कार्ड किन्ने अबस्था छ तर मोवाइल पेमेन्ट सिस्टमले डिजिटल फाइनान्सको सरल एवं सहज व्यवस्था भएपछि निक्कै सहज भएकोमा शेयर सदस्य खुसी रहेको पाइएको छ । मोवाइलमा रकम जम्मा गरेर त्यही रकमबाट विभिन्न सामान खरीद गर्ने तथा स्कूल कलेजको शुल्क तिर्ने, अन्य विभिन्न बिल तिर्ने लगायतका काम गर्दै आएका छन् ।
बैंक तथा वित्तीय संस्थाहरु प्रविधिमा प्रतिस्पर्धात्मक तवरले अगाडी बढिरहेको बेला सहकारी संस्थाहरुले पनि प्रविधिमैत्री सेवा सञ्चालन गरि रहेको सहकारी संस्थाका सुचना प्रविधि अधिकृत रमेश लामिछाने जानकारी दिनुभयो । उहाँँका अनुसार व्राउजरमा आधारित सफ्टवेयर प्रयोग गरिएको छ भने सहकारीका १६ वटानै सेवा केन्द्रमा प्रविधिमैत्री सेवा सञ्चालन गरिएको छ । सहकारीका सेवा केन्द्रहरुबाट विदेशबाट आएको पैसा समेत निकाल्न र पठाउने सक्ने व्यवस्था गरिएको छ भने सहकारीको आफनै सहकारी एप समेत रहेको छ । सहकारीले कोर बैंकिङ्गको २०६८÷०६९ र अन्य प्रविधिको प्रयोग २०७० सालबाट सुरु गरेको सहकारी संस्थाले जनाएको छ ।