मंसिर १५ गते दोलखाका १० मतदान केन्द्रमा पुनः निर्वाचन हुने भएको छ ।
आज बसेको जिल्ला निर्वाचन व्यवस्थापन समितीको बैठकले मंसिर १५ गते मतदान गर्ने निर्णय गरेको हो । बैठकले निर्वाचन आयोगले रद्ध गरेको १० मतदान केन्द्रमा पुनः मंसिर १५ गते निर्वाचन गर्ने निर्णय गरेको मुख्य निर्वाचन अधिकृत डिल्ली रत्न श्रेष्ठले बताउनुभयो ।

मंसिर ४ गते आइतबार भएको निर्वाचनमा दोलखाको वैत्यश्वर गाउँपालिका-६का वैत्यश्वर माध्यमिक विद्यालय मतदान केन्द्रको क, ख, ग, वडा नं २ को जनज्योति माध्यमिक विद्यालय पुतली काठका मतदान केन्द्र क र ख, तामाकोसी गाउँपालिका-३ हेल्थपोस्ट भवन जफे मतदान केन्द्रका क र ख गरी ७ वटा मतदान केन्द्रको निर्वाचन रद्द गर्दै निर्वाचन आयोगको आइतबारको बैठकले पुन: मतदान गर्ने निर्णय गरेको हो ।
नेकपा एमाले दोलखाले मतदान सम्पन्न भए लगतै मंसिर ४ गते साँझ दोलखाको बैतेश्वर गाँउपालिका वडा नम्बर १, २, ३ र ६, तामाकोशी गाँउपालिका वडा नम्बर ३, मेलुङ गाँउपालिका वडा नम्बर ४, गौरीशङ्कर गाँउपालिका वडा नम्बर २, कालिञ्चोक गाँउपालिका वडा नम्बर १ र शैलुङ गाँउपालिका वडा नम्बर २ मा गठबन्धन दलले बुथ कब्जा गरी फर्जी मत खसालेको भन्दै मुख्य निर्वाचन अधिकृतको कार्यालय दोलखामा उजुरी गरेको थियो ।
उजुरी पछि आयोगको एउटा टोलीले दोलखामा स्थलगत अध्ययन गरेको थियो । त्यो टोलीको सिफारिसका आधारमा निर्वाचन आयोगले मंसिर ४ को निर्वाचन रद्द गरेर पुनः मतदान गराउन मुख्य निर्वाचन अधिकृतको कार्यालयलाई निर्देशन दिएको थियो ।