किरात कालमा निर्माण भएको ऐतिहासिक ढुङेधाराको बाग्मती प्रदेश सरकारले पुननिर्माण गरिदिएको छ ।
दोलखाको भिमेश्वर नगरपालिका वडा नम्बर २ को ऐतिहासिक शहर दोलखामा राइती अर्थात पौराणिक ढुङेधारा निर्माण सम्पन्न भएको हो ।
बाग्मती प्रदेश सरकारको खानेपानी महाशाखाबाट प्राप्त सहयोग र जनश्रमदानमा खानेपानी तथा सरसफाई उपभोक्ता समिती मार्फत पुननिर्माण सम्पन्न भएको वडा अध्यक्ष स्टालिन श्रेष्ठले बताउनुभयो ।
बाग्मती प्रदेश सरकारको ५० लाख र श्रमदान ५ लाख ७७ हजार ५ सय ४७ गरी ५५ लाख ७७ हजार ५ सय ४७ रुपैयाको लागतमा पुननिर्माण सम्पन्न भएको हो ।
प्राचीन कालमा निर्माण गरिएको यस धाराको दीर्घकालिन संरक्षणका लागी खानेपानी तथा सरसफाई उपभोक्ता समितीले महिलाको मात्र प्रतिनिधित्व रहेको ७ सदस्यीय संरक्षण समिती निर्माण गरेको छ ।
नियमित सरसफाई र दिगो रुपमा सञ्चालनका लागी २ लाख ५० हजार रुपैयाको अक्षयकोष स्थापना गरिएको समितीले जनाएको छ ।
धाराका विभिन्न भागमा वराह, हनुमान, कृष्ण र नरसिंह नारायणका प्राचिन मुर्ति रहेका छन ।
महिलाले मात्र प्रयोग गर्ने यस धारा परापुर्वकालमा राजाले रानीलाई नुहाउन बनाइदिएको किम्बदन्ती रहेको स्थानीयबासीको भनाई छ ।
प्राचीन शैलीमा आकर्षक झिगटीको छानो सहित पार्टी समेत निर्माण गरिएको छ ।
आफनै इतिहास बोकेको यो धाराबाट घटस्थापनाको दिन त्रिपुरासुन्दरीका पुजारी तथा पुरोहितले विशेष पुजा गरेपछि चोखो पानी थाप्ने चलन आजपनि यथावत छ ।