दशौ राष्ट्रिय पोल्ट्री दिवसको अवसरमा आयोजित सप्ताहव्यापी कार्यक्रममा दोलखामा २ सय ४० क्रेट अण्डा वितरण गरिएको छ । भेटेरिनरी अस्पताल तथा पशु सेवा विज्ञ केन्द्र दोलखाले विभिन्न क्षेत्रमा ७ हजार २ सय अण्डा वितरण गरेको हो ।
वागमती प्रदेशभर आयोजना गरिएको सप्ताहव्यापी कार्यक्रम अन्तरगत गर्भवती महिला,कुपोषण र पुड्कोपना भएका बालबालिका,हिंसा प्रभावित एवं जोखिममा परेका महिला तथा बालबालिका,बालगृहमा रहेका बालबालिका साथै मजदुरहरुलाई ८६ हजार बराबरको अण्डा वितरण गरेको भेटेरिनरी अस्पताल तथा पशु सेवा विज्ञ केन्द्र दोलखाका सुचना अधिकारी डा धु्रव डिसीले बताउनु भयो ।
कार्यालयले हनुमन्तेश्वर माध्यमिक विद्यालय बैत्यश्वरमा अण्डा तथा मासुको उपभोग महत्वबारे स्कुल शिक्षा कार्यक्रमसहित अण्डा खुवाउने कार्यक्रम गरेको थियो भने गौरीशंकर गाउँपालिकामा रहेको अप्पर सुरी मकर जितुमाया हाइड्रोपावरका श्रमिकहरुलाई अण्डा वितरण कार्यक्रम गरेको जनाएको छ ।
कार्यालयले आज एक कार्यक्रमको आयोजना गरि साप्ताहिक रुपमा गरेको अभियानका बारेमा जानकारी गराएको हो ।
वि.स. २०७० साल देखि हरेक वर्ष पौष १७ गतेलाई राष्ट्रिय पोल्ट्री दिवसका रुपमा मुलुकभर विभिन्न कार्यक्रम गरी मनाउने गरिएको छ । साप्ताहिक अभियान भने वागमती प्रदेशमा मात्र गरिएको हो ।