जनसचेतन बचत तथा ऋण सहकारी संस्था दोलखाका नवराज दहाल उत्कृष्ट व्यवस्थापकको रुपमा सम्मानित हुनु भएको छ । जिल्ला सहकारी संघ दोलखाको १७ औं साधारण सभाको अवसरमा सहकारीका प्रमुख कार्यकारी अधिकृतलाई उत्कृष्ट व्यवस्थापकको रुपमा सम्मान गरेको हो ।
प्रतिनिधिसभाका नवनिर्वाचित सांसद गंगा कार्कीले नगद ५ हजारसहित दोसल्ला ओढाएर सम्मान गर्नु भएको हो ।

जिल्ला सहकारी संघ दोलखाका अध्यक्ष हेमन्त चौलागाईँको अध्यक्षतामा भएको कार्यक्रममा सहकारीको क्षेत्रमा विभिन्न विधामा उत्कृष्ट काम गर्ने सहकारी अभियन्ताहरुको सम्मान गरिएको छ । सहकारीले जिल्लामा उत्कृष्ट व्यवस्थापकको कुशल भूमिका निर्वाह गर्न सफल भएको भन्दै जनसचेतन बचत तथा ऋण सहकारी संस्थाका दहाललाई सम्मान गरेको जनाएको छ ।

सम्मानसंगै सहकारी अभियानमा नयाँ उर्जाका साथ लाग्न थप हौसला मिलेको र जिम्मेवारी बोध भएको सम्मानित दहालको भनाइ छ ।
दोलखा जिल्लाभर कार्यक्षेत्र रहेको जनसचेतन सहकारी संस्थाले दोलखासँगै काभ्रेपलान्चोक, भक्तपुर, काठमाडौँ जिल्ला भर र ललितपुर महानगरपालिका थप गरि ५ जिल्लामा सेवा क्षेत्र बिस्तार गरेको छ । सहकारीमा गत आर्थिक वर्षको असार मसान्त सम्म ३६ हजार २सय ५४ जना रहेका छन् भने सहकारीमा हाल कुल पुँजी २ अरब १८ करोड ६९ लाख ४ हजार १ सय ६१ रुपैयाँ रहेको छ । जिल्लाको मात्र उत्कृष्ट सहकारी मात्र नभए एसिया महादेशकै सफल सहकारीको रुपमा परिचित छ ।