१९ माघ

दोलखाका प्रतिनिधि सभाका सांसद ईश्वरी बहादुर रिजालले कालिञ्चोक गाउँपालिका वडा नम्वर ९ कटुवाचौर बजारमा भएको आगलागीबाट पीडितहरुलाई तत्काल राहत र उद्दारको व्यवस्था गर्न माग गर्नु भएको छ । सांसद रिजालले आज तत्काल व्यवस्थापनको माग गर्नु भएको हो ।
सांसद रिजालले विज्ञप्ति जारी गर्दै घटनामा ९ घर जलेर नष्ट भएको तथा घरमा र डेरामा व्यापार गर्ने १५ परिवारको पसल एवं पशुधनसमेत जलेको उल्लेख गरिएको छ । विज्ञप्तिमा तत्काल राहत तथा उद्धारका लागि नेपाल संघीय सरकार, प्रदेश सरकार तथा स्थानीय तहलगायत सरोकारवाला सबै संघ सस्थाको ध्यानाकर्षण गराइएको छ ।  अखिल नेपाल राष्ट्रिय स्वतन्त्र युनियन (अनेरास्ववियु) दोलखाले पनि राहत तथा उद्धारका लागि अपिल गरेको छ ।

यता कटुवाचौरका आगोलागि पिडित परिवारलाई राहत वितरण गरिएको छ । सुन्द्रावतीका ९ घरका १६ पिडीत परिवारलाई जिल्ला विपद व्यवस्थापन समिति दोलखाले तत्कालका लागि राहत स्वरुप १० हजार रुपैयाँ रकम प्रदान गरेको हो । समितिले आगोलागि पीडित राम बहादुर थामी, गोपिलाल थामी,रुद्र बहादुर ओली,अमृता ओली, शंकरकुमार ओली,नवराज सेढाई,चित्रप्रसाद सेढाई, दुर्गा ओली,राजु सेढाई,नारायण गीरी, चित्र बहादुर दर्जी,ओम बहादुर थामी,देवीप्रसाद ओली, कमला खाती, लक्ष्मी विश्वकर्मा र सुरज ओलीको परिवारलाई नगद १०÷१० हजार रुपैयाँका दरले आर्थिक सहित त्रिपाल सहयोग गरेको हो । पिडीत परिवारलाई दोलखाका प्रमुख जिल्ला अधिकारी एंव जिल्ला विपद व्यवस्थापन समितिका अध्यक्ष शेखर पौडेलले हस्तान्तरण गर्नुभएको छ । त्यसैगरी पीडित परिवारलाई जिल्ला नेपाल रेडक्रस सोसाईटी जिल्ला शाखा दोलखाले पनि तत्कालका लागि आवश्यक पर्ने अखाद्य सामाग्रीहरु सहयोग गरेको छ । उक्त सामग्रीहरु नेपाल रेडक्रस सोसाईटी जिल्ला शाखा दोलखाका सभापति गोकर्णप्रसाद पोखरेल र पुर्व सभापति हर्क बहादुर श्रेष्ठको टोलीले पिडीतलाई हस्तान्तरण गरेको हो । काल्चिोक गाउँपालिकाले पनि १ लाख रुपैयाँ रकम सहयोग गर्ने गाउँपालिकाका अध्यक्ष अर्जुन प्रसाद शिवाकोटीले वताउनुभयो ।