काठमाडौं ।
जनसचेतन बचत तथा ऋण सहकारी संस्थाको सेवाकेन्द्र काठमाडौंको जडीबुटी चोकमा सञ्चालन गरिएको छ । काठमाडौं बस्ने शेयर सदस्यहरुको चाहनालाई ध्यान दिएर सेवाकेन्द्र उद्घाटन गरिएको संस्थाका अध्यक्ष हेमन्त चौलागाईँले बताउनु भयो ।
संस्थाका अध्यक्ष हेमन्त चौलागाईको अध्यक्षतामा भएको उद्घाटन कार्यक्रममा अध्यक्ष चौलागाईले ‘शेयर सदस्यहरुको निकै लामो समयदेखिको मागलाई पूरा गर्न सफल भएको धारणा राख्नुभयो ।
सेवाकेन्द्रको उद्घाटन प्रमुख अतिथि राष्ट्रिय सहकारी बैंकका अध्यक्ष केवी उप्रेतीले रिबन काटेर एवं दीप प्रज्ज्वलन गर्दै गर्नुभएको थियो । साथै वैदिक परम्परा अनुसार स्वस्तीपाठ पनि गरिएको थियो ।
केन्द्रको उद्घाटन गर्दै उप्रेतीले अहिले सहकारी क्षेत्रलाई चारैतिरबाट आक्रमण भैरहेकोले यसका विरुद्द एकजुट हुन सबै सहकारीलाई आव्हान गर्नुभयो । उहाँले भन्नुभयो ‘यतिबेला सहकारीका लागि निकै ठूलो संकटको बेला भएकोले सहकारी अभियान जोगाउन सहकारीकर्मीहरु सचेत ढंगले आफ्नो क्षेत्रमा लाग्नुपर्ने बताउनुभयो ।

कार्यक्रममा वागमती प्रोस्कुनका महासचिव जीवसराज खड्काले सहकारी अभियानको उत्कृष्ट सहकारी जनसचेतन भएकाले अन्य सहकारीले पनि यसबाट सिकेर शेयरसदस्यको भावना अनुरुप काम गर्न आग्रह गर्नुभयो ।

जनसचेतनका संस्थाका संस्थापक अध्यक्ष यज्ञराज ढुंगेलले सबै सहकारीहरु सहकारीको मूल्य, मान्यता र कानून अनुसार चल्ने हो भने यो अभियानमा समस्या नहुने बताउनुभयो ।

जनसचेतनका पूर्व सिइयो कृष्ण कुमार श्रेष्ठले जनसचेतन सहकारीले समय अनुसार आफूलाई बजारमा लैजान सकेकाले दिन प्रतिदिन सफलता हाँसिल गरेको बताउनुभयो ।

उद्घाटन कार्यक्रमका सहभागी शेयर सदस्य जयप्रसाद दाहालले भन्नुभयो ‘जडिबुटी चोकको दायाँपट्टी सन्चो भवनको छेउमा सजिलै पुग्न सकिने ठाउँमा सेवाकेन्द्र सुरु गरेकोमा आफूलाई निकै खुशी लागेको छ, जनसचेतलाई धन्यवाद दिन चाहन्छु र सबैलाई जानकारी पनि दिन्छु ।’