दोलखाको विगु गाउँपालिकामा संञ्चालन भएको निशुल्क स्वास्थ्य शिविरमा ७ सय बढीले सेवा लिएका छन् ।
बैतेश्वर गाउँपालिका ५ मैनापोखरीमा रहेको जनसचेतन बचत तथा ऋण सहकारी संस्था र विगु गाउँपालिकाको आयोजना तथा समुन्द्र नेपालको सहयोगमा फागुन ८ र ९ गते विगुको ५, ६, ७ र ८ मा सम्पन्न भएको शिविरमा ७ सय ३३ जनाले सेवा लिएका हुन् ।

विगु गाउँपालिकाको आलम्पुमा आयोजना गरिएको समापन कार्यक्रमलाई सम्बोधन गर्दै जनसचेतन बचत तथा ऋण सहकारीका संस्थाका अध्यक्ष हेमन्त चौलागाईले सहकारीले वित्तिय कारोबार मात्र नभई सामाजिक उत्तरदायित्वका कामहरु पनि गर्ने शिलशिलामा शिविरको आयोजना गरेको बताउनुभयो ।
शिविरबाट प्राप्त उपलब्धीले आफुहरुलाई आगामी दिनमा पनि यस्तै गतिविधी गर्न प्रेरित गरेको भन्दै । चौलागाईंले यस्ता कार्यक्रमहरु संस्थाको कार्यक्षेत्र रहेका अन्य स्थानमा पनि आयोजना विश्वास व्यक्त गर्नुभयो ।

२ दिनसम्म संञ्चालन भएको शिविरमा विगु ५ र ८ मा ४ सय जना र विगु ६ र ७ मा ३ सय ५० जनाले पाठेघर तथा प्रजनन स्वास्थ्य, जनरल स्वास्थ्य जाँच सम्बन्धी निशुल्क स्वास्थ्य जाँच गराएको जनसचेतन सहकारी संस्थाका प्रमुख कार्यकारी अधिकृत नवराज दाहालले जानकारी दिनुभयो ।
उहाँका अनुसार शिविरमा काठमाण्डौ स्थित ग्राण्डी अस्पतालका जनरल फिजिसियन डाक्टर राजिव थपलिया र प्रिया शेर्पा, वीर अस्पतालका सर्जन डाक्टर विजयकुमार शाह, प्रसुती गृह थापाथलीका स्त्री रोग विशेषज्ञ बबिता शाह, ईशान अस्पतालका स्त्री तथा बाल रोग विशेषज्ञ डाक्टर पिङकी शाह, विगु अस्पतालका डाक्टर प्रतिक कुमार ठाकुर लगायतले स्वास्थ्य जाँच तथा परामर्श सेवा दिनुभएको थियो ।

शिविरका क्रममा स्त्री रोगसँग सम्बन्धित केही गम्भीर प्रकृतिका बिरामीहरु समेत फेला परेकोले गाउँपालिकाले आवश्यक समन्वय गरी थप उपचारको व्यवस्था गरिने विगु गाउँपालिकाका स्वास्थ्य संयोजक रत्नबहादुर थामीले बताउनु भयो ।
मैनापोखरीमा मूख्य कार्यालय रहेको संस्थाको विगु गाउँपालिकामा मात्रै ३ सहित जिल्लाभर १६ र राजधानी काठमाण्डौमा १ गरी १७ वटा सेवाकेन्द्रबाट सेवा प्रवाह गरिरहेको छ । संस्थामा ४० हजार सदस्य आवद्ध रहेका छन् भने संस्थाको गत माघ महिना सम्मको कारोबार २ अर्ब ३४ करोड भन्दा बढी रहेको छ ।