दोलखाको भीमेश्वर नगरपालिकामा रहेको बुढाभीमसेन मन्दिरमा चैतको पहिलो साताबाट शिवपुराण महायज्ञ लगाइने भएको छ ।
धार्मिक पर्यटनको विकास गर्ने उद्देश्यले आगामी चैत्र ५ गतेदेखि १५ गतेसम्म शिवपुराण धनधान्यचल पितृ उद्दार महायज्ञ आयोजना गर्न लागिएको हो ।
भीमेश्वर नगरपालिका वडा नं ५ मा रहेको बुढाभीमसेन धाममा कल्याणी माताले प्रवचन दिने कार्यक्रम रहेको छ ।
चैत्र ५ गते विहान ८ बजे कलशयात्रासहित नगर परिक्रमा तथा ११ बजे समुद्घाटन तथा कथा पाठ पारायण प्रारम्भका कार्यक्रम रहेको मन्दिर संरक्षण समितिले जनाएको छ ।

शिव महापुराण पाठ पारायण योगाचार्य पण्डित ललिताशरण गुरागाँई, धर्माचार्य कृष्ण प्रसाद गुरागाँई,बाट सङ्गीतमय शिव महापुराण कथा प्रवचन र प्रसङ्गअनुसार लीलामय झाँकी प्रदर्शनका कार्यक्रम रहेका छन् ।
प्रत्येक साँझ ७ बजेदेखि १० बजेसम्म राष्ट्रिय कलाकार तथा सङ्गीतकारहरुबाट भक्ति सङ्गीत, कथा महात्म्य सुनाइने छ । चैत्र १५ गते दिनको १ बजे पूर्णाहुती, तिलार्चन एवम् समापन कार्यक्रम रहेको आयोजकको भनाइ छ ।
स्कन्द पुराणका अनुसार लोक कल्याणका लागि भगवान भीमशङ्कर ज्योतिलिङ्गका रुपमा दोलखाको धर्मगृह (धरमघर) मा आएर बस्नुभएको थियो ।
स्वस्थानी व्रतकथाका अनुसार महादेवले किराँतेश्वरको रुपमा वन विहार गरेको स्थल भएको विश्वास गरिएको छ भने वन विहारको क्रममा किराँतीछाप धर्मघर हुँदै भीमेश्वर दोलखा गएर भीमसेनले बास गरेको इतिहास रहेको स्थानीय अग्रजको भनाइ रहेको छ ।

हालको धरमघर आसपासका स्थानहरुमा सीतापाइला,सीताको चुल्हो, सीताकुण्ड,गौरीका पाइला,किराँतीछाप ,धर्मघरजस्ता धार्मिक स्थानहरुको नामाकरण रहेको छ ।
यीनै धार्मिक स्थलको प्रचारप्रसार गरी धार्मिक,ऐतिहासिक र पर्यटकीय क्षेत्रलाई धार्मिक सञ्जालमा जोड्न महायज्ञ लगाउन लागिएको आयोजकले जनाएको छ ।
महायज्ञलाई व्यवस्थित रुपमा सम्पन्न गर्न अहिले जिल्ला र राजधानीका दोलखाली र धार्मिक व्यक्तिहरुसंग राय सुझाव संकलन गर्दै छलफल गरिरहेको छ भने सबै पक्षलाई आर्थिक तथा अन्य सहयोग र प्रचार प्रसारका लागि आयोजकले अनुरोध गरेको छ ।