शिक्षाका लागि राष्ट्रिय अभियान नेपालले हिंसामा परेका महिला तथा बालिकाको शिक्षाका सन्दर्भमा अन्तरक्रिया कार्यक्रमको आयोजना गरेको छ । ११३ औ अन्र्तराष्टिय महिला दिवसको सन्दर्भ पारेर सरोकारवालासंग कार्यक्रम गरेको हो ।
कार्यक्रमका प्रमुख अथिति एवं जिल्ला समन्वय समिति दोलखा प्रमुख वर्जुृराम घतानीले महिला तथा बालबालिका हिंसा लगायतका समस्यालाई सबैको साझा सवाल बनाएर जानु पर्ने धारणा राख्नुभयो । स्थानीय सरकारले दायित्व बोध नगरेसम्म सामाजिक समस्या समाधान नहुने भन्दै स्थानीय सरकार बलियो बनाउन सबै लाग्नु पर्ने बताउनु भयो ।

भीमेश्वर नगरपालिकाका प्रमुख ईश्वर नारायण मानन्धरले मानवीय संवेदनाका सवालमा आफू गम्भीर भएको भन्दै खुल्ला मनले बजेटको व्यवस्थापन गर्ने प्रतिवद्धता व्यक्त गर्नुभयो । कार्यक्रमलाई सम्बोधन गर्दै प्रमुख मानन्धरले लक्षित वर्गले सेवा प्राप्त गर्ने कार्यक्रमको अभियानमा लागेको धारणा समेत व्यक्त गर्नुभयो ।
कार्यक्रममा जिल्ला शिक्षा विकास तथा समन्वय इकाई दोलखाका प्रमुख शंकरबाबु श्रेष्ठले हिंसा प्रभावित बालबालिकालाई शिक्षाको अधिकार दिलाउन समन्वय गरेर काम गर्ने धारणा राख्नुभयो । ‘कसैलाई पनि शिक्षाबाट वञ्चित गरिनु हुँदैन,हाम्रो जिम्मेवारी र कर्तव्य पनि हो’ प्रमुख श्रेष्ठले भन्नुभयो ।
हिंसा प्रभावित महिला तथा बालबालिकालाई सेवा प्रदान गर्दै आएको संस्था आवाज नेपाल दोलखाकी अध्यक्ष सिर्जना कार्कीले हिंसा प्रभावित बालबालिकाको शिक्षा र स्वास्थ्यको कठिनाइ साथै चुनौतिका विषयमा जानकारी गराउँनु भयो । हिंसा प्रभावित आमा र उहाँका सन्तान दुबै शिक्षाबाट वञ्चित भएको उदाहरण दिँदै जवरजस्तीकरणीमा परेका बालिका र किशोरीमा सबैभन्दा धेरै समस्या रहेको अनुभव सुनाउनु भयो ।

सम्बन्ध विच्छेद भएका अभिभावकका बालबालिका,मादक पदार्थ सेवन गर्ने अभिभावक,दोस्रो विवाह,पारीवारिक विचलन,वैदेशिक रोजगारजस्ता कारण बालबालिकाको मनोबल कमजोर हुँदै गएको कार्यक्रमका सहभागीले धारण राखे ।
गतवर्षको तुलनामा यो वर्ष बालबालिका हराउने सङ्ख्या बढी रहेको जिल्ला प्रहरी कार्यालयको तथ्याङ्क रहेको छ । बालबालिका हराउनु र घर छाड्नको कारण पनि हिंसा हुनसक्ने अनुमान गरिएको छ ।
कार्यक्रममा महिला अधिकारकर्मी,सामाजिक अभियन्ता,विद्यार्थी नेता, जिल्ला प्रहरी कार्यालय महिला तथा बालबालिका सेल लगायतका प्रतिनिधिको उपस्थिति रहेको थियो ।