तारादेवी बस्नेत
२०७९ चैत्र २६
दोलखाको कालिञ्चोक गाउँपालिका वडा नम्वर ७ को सित्कामा फैलिएको पिपिआर रोग अझै नियन्त्रणमा आउन सकेको छैन । गाउँपालिका वडा नम्वर ७ सुनखानीको सित्कामा गत फागुन महिनाको अन्तिमबाट बाख्रा तथा भेडामा लाग्ने पिपिआर रोग फैलिए पनि अहिलेसम्म नियन्त्रणमा आउन नसकेको कालिञ्चोक गाउँपालिका पशुपंछी विकास शाखाका प्रमुुख संगीता बस्नेतले जानकारी दिनुभयो ।

शाखा प्रमुख बस्नेतका अनुसार सित्काका किसानले पालेका ५० भन्दा धेरै बाख्रा पिपिआर रोगका कारण मरि सकेका छन् । सित्काका किसानहरुले पालेका बाख्राहरु धमाधम मर्न थालेपछि परीक्षण गरिएको थियो । परीक्षण पछि पिपिआर रोग भएको प्रमाणित भएको थियो । एक महिना अघि दैनिक ८ वटा सम्म बाख्राहरु मर्ने गरेका थिए । हाल मर्नेक्रम कमी भएपनि पूर्ण रुपमा नियन्त्रणमा आउन सकेको छैन् ।

अझैपनि सातामा ३ भन्दा बढी बाख्रा मर्ने गरेका छन् । पिपिआर थप फैलन नदिन पालिकाले हाल सघन रुपमा अभियान सञ्चालन गरी खोप लगाइएको  जनाएको छ ।
पिपिआर भेडा तथा बाख्रामा लाग्ने हैजा रोग हो ।