दोलखाको तामाकोशी गाउँपालिकाले सेवा अवधि २० वर्ष पुगेका शिक्षकहरूलाई अवकाश सुविधा दिने भएको छ ।
विद्यालयमा २० वर्षदेखि सेवा गर्दै आएका ५५ वर्षमाथिका इच्छुक शिक्षकलाई शिक्षक स्वर्णिम अवकाश कार्यक्रम कार्यान्वयन कार्यविधि –२०७९ अनुसार अनुसार अधिकतम ३ लाख रुपैयाँ सुविधासहित अवकास सेवा दिने गाउँपालिका अध्यक्ष प्रोण प्रताप केसीले बताउनु भयो ।
गाउँपालिकामा रहेका सामुदायिक विद्यालयको शैक्षिक गुणस्तर अभिवृद्धिका पालिकाले सुविधासहित अवकाश दिने भएको हो ।
अवकाश सेवा लिन इच्छुक शिक्षकले आवश्यक कागजातसहित पालिकाको शिक्षा शाखामा निवेदन दिनुपर्ने व्यवस्था रहेको पालिकाले जनाएको छ । अवकाश लिन इच्छुक शिक्षकलाई जेठ २४ गतेभित्र निवेदन दिन पालिकाले सूचना जारी गरेको छ ।
यसैबीच गाउँपालिकाले सामुदायिक विद्यालयमा प्रधानाध्यापक पनि खुल्ला प्रतिस्पर्धामार्फत छनौट गर्ने तयारी गरेको छ । प्रधानाध्यापक नियुत्ति सम्बन्धी कार्यविधि २०७९ अनुसार सामुदायिक विद्यालयमा खुला प्रतिस्पर्धाबाट प्रधानाध्यापक छनौट गर्न लागिएको गाउँपालिका अध्यक्ष केसीको भनाइ छ।
प्रधानाध्यापकको प्राथमिक तह र आधारभूत तहको (१–६) प्रधानाध्यापकको लागि मान्यता प्राप्त शिक्षण संस्थाबाट कम्तीमा प्रविणता प्रमाणपत्र तह वा सोसरह उत्तीर्ण गरेको, १ देखि ८ सम्मको लागि स्नातक तह वा सोसरह, माध्यमिक तहको लागि मान्यता प्राप्त विश्व विद्यालयबाट कम्तीमा स्नातकोत्तर तह वा सो सरह उत्र्तीण हुनुपर्ने पालिकाले आवश्यक न्यूनतम योग्यतासमेत निर्धारण गरेको छ।