सफा र सुन्दर बस्तीका रुपमा जिलु गाउँलाई चिनिन्छ । जिलु र फसिँभैमा एकीकृत बस्ती निर्माण निरन्तर छ । वडा भौतिक सुविधासम्पन्न छ । एकीकृत बस्तीसहित १ हजार घरधुरी रहेको वडा नं ४ जिलुका प्रत्येक टोलमा सडक सञ्जालले जोडेको छ । सडक सञ्जाल भित्री बस्तीसम्म पुगेकै कारण यहाँका उत्पादन बजार सम्म पु¥याउन सहज भएको छ ।

दोलखाको आत्मनिर्भर गाउँका रुपमा पुरानो पहिचान भएको ठाउँ हो जिलु । दोलखा सदरमुकाम चरिकोट नजिकै भएर पनि सडक सञ्जाल नजोडिदा पनि दुध र तरकारी निकासी शुरु भएको थियो । विहान सबेरै उठेर डोकोमा भारी बोकेर सदरमुकाम ल्याउनु जिलुका किसानको दैनन्दिनी हुन्थ्यो पहिला पनि ।
स्थानीय भक्तबहादुर चौलागाईँका अनुसार वि.स. २०१४÷०१५ सालतिर नन्दलाल चौलागाईँले काठमाण्डौमा आलु रोपेको देखेर जिलुमा आएर आलु खेती गर्नु भएको थियो । विस्तारै अरु उत्पादन पनि विकास हुँदै गयो । दोलखा सदरमुकाम चरिकोट नजिकै भएका कारण तरकारी लगेर बेच्ने चलनको शुरुवात जिल्लामा जिलुले गरेको थियो । सडक सञ्जाल नजोडिदासम्म दुखले उत्पादन बजार ल्याउने जिलुबासी अहिले सडक सञ्जाल जोडिएपछि उत्पादनमा बृद्धिसंगै निकासीमा सहज भएको बताउँछन् ।

यहाँका कृषकको आयआर्जनको बाटो नै तरकारी, फलफूल र दूध हा । ०५४ सालमा पीपलबोट जिलु सडक खोलिएपछि हिउँदको समयमा भएपनि उत्पादन बजार पु¥याउन राहत भएको थियो । अहिले भटमासे जिलु सडक पक्कीको क्रममा छ । बाटो स्तरोन्नति भएर नियमित गाडी चल्न थालेपनि जनजीवनमा निक्कै रुपान्तरण भएको स्थानीय शिक्षक समेत रहनु भएका हरिवंश चौलागाईँको भनाइ छ ।
’शिक्षा,स्वास्थ्य त सहज छ नै अहिले आलु मात्र पनि ३०/४० मुरी एकै परिवारले फलाउन थालेका छन् ’ उहाँले भन्नुभयो ।
सडकका हिसाबले जिलु जिल्लाकै नमुना गाउँ हो ,जहाँ बस्तीपिच्छे मोटर पुगेका छन् । अन्न मात्रै उत्पादन हुने खेतबारीमा तरकारी र दूधको उत्पादन फस्टाएको छ। ’सडक नभएको भए व्यावसायिक उत्पादन सम्भव थिएन जिलु सापकोटा गाउँका गोविन्द सापकोटाले भन्नुभयो, “गाउँमा सिञ्चाईँको सुविधा हुने हो भने उत्पादनमा नमुना गाउँ बनाउने थियौ ।”
अहिले ८ रोपनी क्षेत्रफलमा दोलखालाई पुग्ने गोलभेँडा उत्पादन गर्न लागेको गोलभेडा व्यवसायी रमेश चौलागाईले बताउनु भयो । ’उत्पादन गरेको चीज बजार सजिलै लान सक्नु नै ठूलो उपलब्धि हो,उहाँले भन्नुभयो ।
सडक नबन्दा हामी रातभर सुत्न पाउँदैनथ्यौ । सबैभन्दा बढी महिलालाई भार थियो । विहान २ बजे नै उठेर बाटो लाग्नु पथ्र्यो । अहिले त स्वर्ग भएको छ जिलु टहलेकी पदममाया श्रेष्ठले खुसी व्यक्त गर्नुभयो ।
सडक छेउमा अधिकाशं घर बनेका छन् । भटमासेदेखि फसिभैसम्म मात्रै दर्जनौ होटल पसल सञ्चालनमा छन् । चरिकोटमा रहेका क्याम्पस घरबाटै पढ्न जान पाएका छन् । पहिला चरिकोटमा कोठा भाडामा लिएर बस्नु पथ्र्यो । जागिरेहरुपनि चरिकोटका अफिस घरबाटै भ्याउने भएका छन् । चरिकोटमा रहेका निजी स्कुलमा पढ्न घरबाटै नानीबाबुहरु स्कुल बस चढेर जान्छन् । चरिकोटदेखिका स्कुल बस,ट्याक्सी,ट्याम्पो,मोटरसाइकलको लाइन देख्दा त खुबै रमाइलो लाग्छ जिलुका दिल बहादुर श्रेष्ठलाई ।
जिलुलाई सदरमुकाम चरिकोट ९ किलो मिटर लम्वाइको भटमासे जिलु सडकले जोडेको छ । वागमती प्रदेश सरकारको सहयोगमा सडक अहिले पक्की बन्ने क्रममा छ । सडकको विस्तारले सबै टोलमा आवातजावता सहज भएको छ ।

दोलखा सदरमुकाम चरिकोटसंगै जोडिएको वडा नं ४ मा प्रदेश सरकारको लगानी विभिन्न क्षेत्रमा रहँदै आएको छ । निर्माणाधीन भटमासे जिलु सडकसंगै देवीस्थान निर्माण,वृन्दावन,पाण्डव पार्क,सहिद पार्क, डिही माने सडक,पीप्ले सडकमा पनि प्रदेश सरकारको लगानी छ । विकासका लागि प्रदेश सरकारको लगानी भएपनि प्रर्याप्त नभएको वडाध्यक्ष रामजी चौलागाईँको भनाई छ ।
वडाध्यक्ष चौलागाईका अनुसार सडकको विकाससंगै कृषि क्षेत्रमा लगानीको आवश्यक छ । युवा शक्तिलाई विदेश पलायनबाट रोक्न श्रममा जोडिएर काम गर्ने वातावरण बनाउने वडाको अभियान छ, प्रदेश सरकारको लगानी वृद्धि भए कृषि हवको विकास गर्न सम्भव थियो ।